पणजी: गोव्यातील जनतेला मुख्यमंत्र्यांशी थेट संपर्क करता यावा म्हणून गोवा सरकारकडून 'आमचो दोतोर' हे नवीन ॲप सुरु करण्यात आलेय. गोव्यातील जनता हे ॲप आपल्या मोबाईलमध्ये डाउनलोड करू शकते, ज्यावर त्यांना राज्य सरकारकडून राबवल्या जाणाऱ्या योजना, नोकरीच्या संधी तसेच इतर महत्वाची माहिती दिली जाणार आहे.

गोमंतकीय जनतेचे प्रश्न मुख्यमंत्र्यांपर्यंत पोहोचावे म्हणून मुख्यमंत्रीपदाची सूत्रे हाती घेतल्यापासून डॉ. प्रमोद सावंत अनेक योजना राबवत आहेत. यापूर्वी दूरदर्शनवर हॅलो गोंयकार नावाचा कार्यक्रम दर शुक्रवारी प्रदर्शित केला जायचा. या कार्यक्रमात मुख्यमंत्री स्थानिकांच्या प्रश्नांवर तोडगा काढायचे, त्यांच्याशी थेट संपर्क साधायचे.

खूपच कमी काळात या कार्यक्रमाने लोकांचा भरगोस प्रतिसाद मिळवला होता आणि आता राज्यातील जनांतेची खुशाली जाणून घेण्यासाठी मुख्यमंत्र्यांनी आमचो दोतोर हे नवीन ॲप सुरु केले आहे.

गोमंतकीय या ॲपचा वापर करून थेट मुख्यमंत्र्यांशी संपर्क करू शकतात. गावातील तसेच शहरातील प्रत्येकाला मदत मिळावी म्हणून हा प्रयत्न हाती घेतला गेलाय. शिवाय तळागाळातील जनतेला सरकारकडून पुरेपूर मदत मिळावी म्हणून सरकारचे प्रयत्न सुरु आहेत आणि यासाठीच म्हणून सध्या गोव्यातील आमचो दोतोर नावाचा ॲप तयार केला आहे. या नवीन ॲपचा वापर करून गोव्यातील जनता राज्य सरकारच्या विविध योजनांबद्दलची माहिती एका क्लिकवर मिळवू शकणार आहे, शिवाय राज्यातील प्रशासनबरोबर थेट संपर्क करणं देखील त्यांच्यासाठी सोपं होईल.