सांगे: धो धो पाऊस, वादळी वारे, वीज नाही, मोबाईलला नेटवर्क नाही अन कानठळ्या बसवणारा विजांचा आवाज. अशा आपत्कालीन स्थितीत कोणालाही संपर्क करणे शक्य नव्हते. अशा कठीण परिस्थितीतही भाटीचे माजी उपसरपंच चंद्रकांत गावकर यांनी सहकाऱ्यांना सोबत घेऊन झाडांनी वेढलेल्या रुग्णवाहिकेचा रस्ता मोकळा केला. सलग दोन तास हा थरार सुरू होता. अवकाळी पावसाने सांगे भागाला झोडपून काढले. त्यामुळे अनेक भागात झाडांची पडझड झाली. विलियण भाटी येथील मुख्य रस्त्यालगत वीज वाहिन्यावर काजूचे झाड पडल्यामुळे रस्ता वाहतुकीस बंद झाला, तर वालंकिणी येथील मुख्य रस्त्यावर फणसाचे झाड पडल्याने वाहतूक ठप्प झाली. यातच तुडव-नेत्रावळी येथील रुग्णाला घेऊन आलेली १०८ रुग्णवाहिका अडकून पडली. वीज नाही, मोबाईलला नेटवर्क नाही अन कानठळ्या बसणाऱ्या विजांमुळे कोणालाही संपर्क करणे शक्य झाले नाही.

नेटवर्कअभावी मदतकार्यात अडथळा

रात्री साडेनऊच्या सुमारास जोरदार पाऊस, वादळी वारे, सोबतच वीज कडाडू लागल्याने घबराट निर्माण झाली असतानाच मुख्य रस्त्यालगतची झाडे वीज खांबांवर कोसळल्याने वीज गुल झाली आणि वाहतूकही ठप्प झाली. झाला. ग्रामीण भाग असल्यामुळे बीएसएनएलशिवाय अन्य कोणतेही नेटवर्क येथे चालत नाही. त्यात वीजपुरवठा खंडित झाला. त्यामुळे तासभर अग्निशमन दलाला संपर्क करणे कठीण झाले.

रुग्णासाठी प्रयत्नांची शिकस्त

छातीत कळ आल्यामुळे एका रुग्णाला रुग्णवाहिकेतून इस्पितळाकडे नेले जात होते. पण वाटेत झाडे पडली असल्याने रस्त्यावरील प्रत्येकाचा जीव तळमळू लागला. अखेर भाटीचे माजी उपसरपंच चंद्रकांत गावकर यांनी सहकाऱ्यांना घेऊन रुग्णवाहिका सुटू शकेल इतका रस्ता मोकळा करून दिला.