केंद्रीय गृहमंत्री अमित शहा यांच्यासह भाजपचे नेते ‘म्हादई’च्या मुद्यावर जनतेसमोर सत्य बोलण्याची हिंमत दाखवू शकले नाहीत आणि यासाठी त्यांची बनावट ‘हिंमत’ जनतेसमोर उघड झाली आहे, अशी टीका काँग्रेस मीडिया विभागाचे अध्यक्ष अमरनाथ पणजीकर यांनी केली.

पणजीकर यांनी दिलेल्या प्रसिद्धी पत्रकात म्हटले आहे की, काही दिवसांपूर्वी, भाजपचे अध्यक्ष सदानंद शेट तानावडे यांनी म्हादई नदीच्या प्रश्नावर राज्य सरकार कोणतीही तडजोड करणार नाही, हे कर्नाटकच्या माध्यमांनाही सांगण्याची हिंमत पक्षाच्या नेत्यांमध्ये आहे, असे म्हटले होते.

तेव्हा आपण त्यांना आव्हान दिले होते आणि अमित शहा यांच्या सभेत असे विधान करून दाखविण्याचे धाडस दाखवा, असे म्हटले होते.

आज भाजपच्या एकाही नेत्याने जाहीर सभेत म्हादईच्या मुद्यावर बोलण्याचे धाडस केले नाही. तथापि, शहा यांनी राज्याच्या अर्थसंकल्पीय योजनांचा फुशारकी मारून मुद्दा वळविण्याचा प्रयत्न केला, असेही ते म्हणाले.

"काँग्रेस नेते केवळ म्हादईच्या मुद्यावर भाजप नेत्यांकडून स्पष्टीकरण मागून निषेध करण्याचा प्रयत्न करत होते. गोवा सरकार आणि पोलिसांच्या कृतीने भाजपने लोकशाहीची हत्या केली आहे."

- अमरनाथ पणजीकर