मडगाव : मडगाव अर्बन बँकेच्या खातेधारकांसाठी महत्त्वाची बातमी आहे. कारण मडगाव अर्बनच्या सर्व 9 शाखा 1 एप्रिलपासून बंद करण्याचा निर्णय घेण्यात आला आहे. आज यासंबंधीचं प्रसिद्धीपत्रक बँकेकडून जारी करण्यात आलं आहे. (Madgaon Urban Bank News Updates)

मडगाव (Madgaon) अर्बन बँकेच्या गोवा राज्यभरात एकूण 9 शाखा आहेत. 27 जुलै 2021 रोजी मडगाव अर्बनचा बँकिंग परवाना रिझर्व्ह बँक ऑफ इंडियाकडून रद्द करण्यात आला होता. त्यामुळे बँकेच्या सर्वच खातेधारकांमध्ये चिंतेचं वातावरण होतं. यानंतर रिझर्व्ह बँकेच्या सूचनेनंतर सहकारी संस्थांच्या रजिस्ट्रारकडून बँकेवर प्रशासक नेमण्यात आला होता. आता या बँकेच्या सर्व शाखाही बंद केल्या जाणार आहेत.

रिझर्व्ह बँकेने (RBI) परवाना रद्द केल्यानंतर एस व्ही नाईक यांची प्रशासकपदी नियुक्ती करण्यात आली होती. आर्थिक अनियमिततेच्या ठपक्यानंतर बँकेचं कामकाज प्रशासकामार्फत सुरु होतं. यानंतर खातेदारांचे पैसेही देण्यात येणार होते. आता 1 एप्रिलपासून गोव्यात असलेल्या मडगाव, सांगे, मडगाव जुने मार्केट, कुडतरी, बाणावली, पणजी (Panjim), सांत आंद्रे, आके आणि फोंडा या सर्व शाखा बंद केल्या जाणार आहेत.