मडगाव: मंत्रिपद मिळाले नाही म्हणून मी नाउमेद झालेलो नाही. कुडतरी मतदारसंघाचा विकास, हेच माझे उद्दिष्ट असून त्यासाठीच मी सरकारला बिनशर्त पाठिंबा दिला आहे. मी मतदारसंघाची कामे या सरकारकडून करून घेईन, अशी प्रतिक्रिया कुडतरीचे आमदार आलेक्स रेजिनाल्ड लॉरेन्स यांनी व्यक्त केली.

रेजिनाल्ड यांना मंत्रिपद मिळाले नाही म्हणून त्यांचे समर्थक नाराज आहेत. भाजपने रेजिनाल्ड यांना शब्द देऊन नंतर तो फिरवला, अशी त्यांच्यात भावना निर्माण झाली आहे. या पार्श्वभूमीवर रेजिनाल्ड यांची प्रतिक्रिया विचारली असता, मी निराश झालेलो नाही. मला कुठलीही गोष्ट सहज मिळालेली नाही. मी प्रत्येक गोष्ट संघर्ष करून कमावली आहे, असे ते म्हणाले. मी राजकारणात पैसे कमावण्यासाठी आलेलो नाही. इतरांप्रमाणे मंत्री बनून पैसा करण्याचे माझे ध्येय नाही. मी कालही लोकांची कामे करण्यासाठी राजकारणात आलो होतो, उद्याही त्यासाठीच मी राजकारण करीत राहणार, असे ते म्हणाले.