कोकणी ही मराठीची बोलीभाषाच. गोव्यातील राजकारण्यांनी मराठीचा बळी देऊन कोकणीला राजभाषा करत बहुसंख्याकांची भाषा फेकून दिली. अस मत अखिल भारतीय मराठी साहित्य संमेलनाचे अध्यक्ष कौतुकराव ठाले पाटील यांनी व्यक्त केले. तर दुसरीकडे पोर्तुगीजांनी कोकणी भाषेवर 300 वर्षे बंदी घातली. जगातील इतर कोणत्याही भाषेवर असा वाईट प्रसंग आला नसेल. कोकणीला मराठीची बोलीभाषा मानणारे त्याच बोलीभाषेतून लिहिणार्‍यांवर आक्षेप का घेतात? असा सवाल ज्ञानपीठ पुरस्कार प्राप्त दामोदर मावजो यांनी केला आहे.

- अभिव्यक्ती स्वातंत्र्य अबाधित ठेवा

साहित्य प्रफुल्लित ठेवायचं असेल तर अभिव्यक्ती स्वातंत्र्य अबाधित ठेवले पाहिजे. पण जेव्हा सत्तेला माज चढतो, तेव्हा निर्बंध लादले जातात. एकाधिकारशाही बळकट करताना फॅसिझमला खतपाणी मिळते. अशावेळी साहित्यकार हात बांधून शांत बसू शकतात का?, अशी विचारणा यावेळी त्यांनी केली.

- बंडखोर लेखक तयार व्हावेत

सत्तेपुढे नांगी टाकणारे आपल्याकडे खूपजण आहेत. त्यांची प्रतिभा कुठे गवत खाते माहिती नाही. साहित्यिकांमध्ये सत्तेत येतो, त्यांच्यासाठी चिअर करणारे चिअर लीडर्स तयार झालेत ही फार दुर्दैवी बाब आहे, अशी खंत यावेळी त्यांनी व्यक्त केली. विद्रोही, बंडखोर लेखक तयार झाले पाहिजेत, असेही यावेळी ते म्हणाले.