मडगाव: मुंबई ते गोवा या ‘कॉर्डेलिया’ प्रवासी बोटीवरून बेपत्ता झालेल्या एकाचा मृतदेह शनिवारी (१९ एप्रिल) सायंकाळी सेर्नाभाटी किनाऱ्यावर आढळला. अजय केळकर असे त्‍याचे नाव आहे. त्‍याच्‍याकडे सापडलेल्या व्‍हिजिटिंग कार्डावरून त्याचे नाव समजले.

मृतदेह संपूर्ण सडलेला होता. पोलिस तपासात त्याची ओळख पटली. पंधरा दिवसांपूर्वी वास्को येथून तो त्या जहाजावरून बेपत्ता झाला होता. त्याने समुद्रात उडी मारली होती, असे पोलिसांनी सांगितले.

शनिवारी सेर्नाभाटी किनारपट्टीवर तैनात पर्यटन पोलिसांना हा मृतदेह नजरेस पडला. मागाहून कोलवा पोलिसांना त्याबाबत कळविण्यात आले.

घटनास्थळी जाऊन पोलिसांनी पंचनामा करून मृतदेह ताब्यात घेतला. अनैसर्गिक मृत्यू म्हणून कोलवा पोलिसांनी हे प्रकरण नोंद केले असून मृतदेह दक्षिण गोवा जिल्हा इस्पितळाच्या शवागारात ठेवला आहे. उपनिरीक्षक प्रथमेश महाले पुढील तपास करत आहेत.