पणजी: अहमदाबाद - गुजरात येथे एअर इंडिया विमानाच्या अपघातानंतर बंद करण्यात आलेली गोवा ते लंडन (गॅटविक) विमानसेवा पुन्हा सुरु होणार आहे. आठवड्यातून तीन दिवस ही विमानसेवा सुरु राहणार आहे. राज्यसभा खासदार सदानंद शेट तानावडे यांनी याबाबत माहिती दिलीय. नागरी उड्डाण खात्याचे राज्यमंत्री मुरलीधर मोहोळ यांची भेट घेऊन तानावडे यांनी हा विषय सोडवल्याची माहिती दिली.

अहमदाबाद येथून लंडनच्या दिशेने निघालेल्या एअर इंडियाच्या विमानाचा १२ जून रोजी अपघात झाला. या अपघातात २६० नागरिकांचा मृत्यू झाला होता. या अपघातानंतर कंपनीने गोवा ते लंडन थेट विमानसेवा अनिश्चित काळासाठी बंद करण्याची घोषणा केली.

यामुळे गोव्यातील पर्यटनावर त्याचा विपरित होण्याच्या भीतीने विमानसेवा पुन्हा सुरु करण्याची मागणी सत्ताधारी तसेच विरोधी पक्षातील आमदार व नेते करत होते. या मागणीला अखेर यश आले असून, कंपनीने विमानसेवा सुरु करण्याचा निर्णय घेतला आहे.

भाजप राज्यसभा खासदार सदानंद शेट तानावडे यांनी याबाबत माहिती दिली आहे. तानावडे यांनी नागरी उड्डाण खात्याचे राज्यमंत्री मुरलीधर मोहोळ यांची भेट घेऊन हा विषय सोडवला आहे.

गोवा ते लंडन (गॅटविक) थेट विमानसेवा येत्या २६ ऑक्टोबर २०२५ पासून सुरु होणार असून, आठवड्यातून तीन दिवस (मंगळवार, शुक्रवार आणि रविवार) कार्यरत असेल, अशी माहिती तानावडे यांनी दिली आहे.

गोवा ते लंडन विमानसेवा सुरु करण्याबाबतचा विषय सत्ताधारी तसेच विरोधी पक्षातील आमदारांनी देखील नुकत्याच पार पडलेल्या पावसाळी अधिवेशनात मांडला होता. मुख्यमंत्री डॉ. प्रमोद सावंत यांनी हा विषय केंद्राकडे मांडून सोडविण्याचे आश्वासन दिले होते.

दरम्यान, खासदार तानावडे यांनी मंत्री मोहोळ यांच्याशी चर्चा करुन विमानसेवा पुन्हा सुरु होणार असल्याचे निश्चित केले आहे. तसेच, यासाठी त्यांनी मोहोळ यांचे आभार मानले आहेत.