पणजी: तीन दिवसात घर दुरुस्तीची मंजुरी हा निर्णय सरकारने घेतल्यापासून पंचायत कार्यालयातील सचिव व कर्मचाऱ्यांची अनुपस्थितीचे किस्से सरकारपर्यंत पोचू लागले आहेत. यामुळे आता पंचायत कर्मचाऱ्यांसाठी अत्याधुनिक पद्धतीने हजेरी लावण्याची सोय केली जात आहे.

पंचायत संचालनालयाकडून गोवा इलेक्ट्रॉनिक्स लि. या सरकारी कंपनीकडे हे काम सोपवण्यात आले आहे. त्यानुसार हजेरी नोंद करण्यासाठी कृत्रिम बुद्धिमत्तेवर आधारीत प्रणाली विकसित करण्यात येत आहे. कोणत्याही पंचायतीतील कर्मचाऱ्यांची हजेरी कुठूनही अधिकाऱ्यांना पाहता येईल अशी व्यवस्था केली जात आहे.

कृत्रिम बुद्धिमत्ता आधारित रिअल-टाइम उपस्थिती व्यवस्थापन प्रणाली सुरू करणार आहे. या उपक्रमाचा उद्देश कर्मचाऱ्यांची उपस्थिती चेहराचिन्ह ओळख प्रणालीच्या माध्यमातून तपासणे आहे, ज्यामुळे गैरप्रकार रोखले जातील आणि नागरिकांना सेवा पुरवण्याची प्रक्रिया सुलभ होईल.

गोवा इलेक्ट्रॉनिक्स लिमिटेड ेही राज्याची प्रमुख माहिती तंत्रज्ञान संस्था, या प्रकल्पाच्या अंमलबजावणीची जबाबदारी पार पाडणार आहे. सरकारच्या निर्देशानुसार, जेल ही संपूर्ण प्रकल्पाची अंमलबजावणी करणार आहे, ज्यामध्ये अंमलबजावणी संस्था निवडणे, प्रकल्प नियोजन, वितरण आणि एकूण देखरेख यांचा समावेश आहे. या कृत्रिम बुद्धिमत्तेवर आधारीत प्रणालीचा वापर ॲड्राईड,आयओएस आणि वेब प्लॅटफॉर्मवर होणार आहे, ज्यामुळे ती विविध उपकरणांवर उपलब्ध होईल आणि दूरस्थ ठिकाणाहून रिअल-टाइम निरीक्षण शक्य होईल, अशी माहिती सूत्रांनी दिली.

गैरप्रकार टाळण्यावर भर

सरकारने अलीकडेच या प्रकल्पासाठी तांत्रिक कंपन्यांना सहभागी होण्यासाठी देकार मागवले आहेत. या प्रकल्पाचा मुख्य उद्देश पारंपरिक उपस्थिती नोंद प्रणाली जसे की कागदी रजिस्टर आणि बायोमेट्रिक फिंगरप्रिंट स्कॅनर यांना चेहराचिन्ह ओळख तंत्रज्ञानाने बदलणे आहे. ही प्रणाली “बडी पंचिंग” म्हणजेच एक कर्मचारी दुसऱ्या कर्मचाऱ्याची उपस्थिती नोंदवणे, हा गैरप्रकार टाळण्यासाठी विशेषतः उपयुक्त ठरणार आहे.