Goa Farming:

तारेचे कुंपण असताना गव्यांकडून शेताची नासाडी होत असल्याने देवाबाग येथील शेतकरी प्रेमानंद विठोबा बांदेकर हे हैराण झाले आहेत. वन विभागाने या गव्याचा बंदोबस्त करावा तसेच नुकसान भरपाई द्यावी, अशी मागणी बांदेकर यांनी केली आहे.

बांदेकर यांनी दिलेल्या माहितीनुसार देवाबाग येथे आपण भात शेती रोवली असून पूर्ण शेताभोवताली तारेचे कुंपण उभारले आहे. तरीही रात्रीच्यावेळी शेताची नासाडी होत असल्याने पाहून आपण रात्री पाळत ठेवली असता तारेच्या कुंपणावरून उडी घेउन शेतात गवा चरताना आढळला.

गेली पन्नास वर्षे मी शेतीचा व्यवसाय करीत आहे. मात्र कधीच गव्याने शेतात घुसून नासाडी केली नव्हती. शेती लागवडीसाठी आतापर्यंत सुमारे दीड लाख रुपये खर्च करण्यात आला आहे, परंतु गव्यामुळे पूर्ण मेहनत व पैसा पाण्यात गेला आहे, असे ते म्हणाले.

वन विभाग उपयोजना करणार : वायंगणकर

वन खात्याने या गव्याचा बंदोबस्त करावा. तसेच कृषी खात्याने नुकसानीची पाहणी करून भरपाई द्यावी अशी मागणी बांदेकर यांनी केली. यासंदर्भात क्षेत्रीय वनाधिकारी नारायण वायंगणकर यांना विचारले असता या संदर्भात अजून तक्रार आलेली नाही, तरीही चौकशी करून योग्य उपाययोजना करण्यात येईल, असे ते म्हणाले.