पणजी : आम आदमी पक्षाचे कळंगुट मतदारसंघाचे उमेदवार सुदेश मयेकर पुन्हा भाजपवासी झाले. माजी आमदार मायकल लोबो यांच्याशी असलेल्या राजकीय मतभेदांमध्ये त्यांनी भाजपपासून फारकत घेत आम आदमी पक्षात प्रवेश केला होता. यानंतर त्यांनी आप’च्या (AAP) तिकिटावर कळंगुट मतदारसंघातून निवडणूक लढवली होती. मात्र, त्यांना त्यात यश आले नाही. शनिवारी संध्याकाळी भाजपच्या पणजीतील कार्यालयात प्रदेशाध्यक्ष सदानंद शेट तानावडे यांच्या उपस्थितीत पक्षामध्ये प्रवेश केला.

याप्रसंगी त्यांच्या कार्यकर्ते, समर्थकांनी भाजपमध्ये मोठ्या संख्येने प्रवेश केला. यावेळी तानावडे म्हणाले, मयेकर यांचे लोबो यांच्याशी असलेल्या मतभेदामुळे ते भाजपपासून दुरावले होते. आता ते पुन्हा स्वगृही परतल्याने कळंगुट (Calangute) मतदारसंघातील पक्षाची ताकद वाढली आहे. भाजपने (BJP) राज्यात पुन्हा एकदा सरकार स्थापन केले आहे. निवडणुका झाल्यापासून हा दुसरा पक्ष प्रवेश आहे. यानंतर देखील अनेक नेते भाजपमध्ये सामील होणार असल्याचे बोलले जात आहे.

दरम्यान, ॲड. यतीश नाईक यांनी 11एप्रिल रोजी भाजपमध्ये प्रवेश केला आहे. प्रदेशाध्यक्ष सदानंद तानावडे यांच्या उपस्थितीत हा पक्ष प्रवेश झाला. काँग्रेस (Congress) सोडून ते तृणमूल काँग्रेसमध्ये गेले होते. पण काही दिवसांनंतर त्यांनी तृणमूलला रामराम दिला होता. त्यांनी आपल्या कार्यकर्त्यांसह प्रवेश केला. याला कार्यकत्यांनी देखील आपला पाठिंबा दर्शवला.