पर्यटन स्थळ म्हणून देश-विदेशात प्रसिद्धीस पावलेल्या मये तलावाला अखेर आठ वर्षांच्या कालखंडानंतर पर्यटकांनी भेट दिली आहे. पर्यटन विकास महामंडळातर्फे या पर्यटन सफरीचे आयोजन करण्यात आले आहे. यावेळी मयेचे आमदार प्रेमेंद्र शेट यांनी पर्यटकांचे स्वागत केले. यावेळी आनंद व्यक्त करीत ते म्हणाले, "मये तलाव जगाच्या नकाशावर प्रसिद्ध पर्यटन स्थळ म्हणून नावारूपाला आले आहे, मात्र गेल्या आठ वर्षांत सुविधांच्या अभावामुळे तलावाला भेट देण्यास पर्यटक आले नाही".

म्हापसा रेसिडेन्सी येथून मयेचे आमदार प्रेमेंद्र शेट यांनी झेंडा दाखवत सकाळी या पर्यटन सफरीला प्रारंभ करण्यात आला. या सफरीमध्ये मये तलाव, रुद्रेश्वर मंदिर, हरवळे येथील धबधबा आणि पांडव गुहा, साखळी येथील विठ्ठल मंदिर, नार्वेतील सप्तकोटेश्वर मंदिर आणि डॉ. सलीम अली वन्यजीव अभयारण्य चोराव ही स्थळे कव्हर करणार आहेत. एक काळ असा होता, की मये तलाव म्हणजे देशी-विदेशी पर्यटकांचे आकर्षण ठरले होते. आता पर्यटन विकास महामंडळातर्फे पर्यटन सफरीचे आयोजन करण्यात आल्याने मये तलावाचे भाग्य उजळणार आहे. 

मये तलावाचा हवा तसा विकास झाला नसल्याने या तलावाकडे पर्यटकांनी पाठ फिरवली होती. सात वर्षांपूर्वी मयेचे तत्कालीन आमदार स्व. अनंत शेट यांच्या प्रयत्नातून तलावाच्या विकसित कामाचा प्रस्ताव मार्गी लागला. पर्यटन विकास महामंडळाकडून या तलावाचा विकास करण्यात आला आहे. विकासकामानिमित्त गेल्या सहा-सात वर्षांपासून मये तलाव पर्यटनासाठी बंद होता. मात्र आता या तलावात बोटिंग सुविधाही सुरु करण्यात आली आहे. दोन वर्षांपूर्वी या तलावस्थळी पर्यटकांना आकर्षित करणारी ‘बंजी जंपिंग’ सुविधा उपलब्ध करण्यात आली आहे. आठ वर्षांनंतर पर्यटन विकास महामंडळाच्या पुढाकारातून पर्यटकांनी तलावाला भेट दिली आहे.