फोंडा : गोवा डेअरीच्या (Goa Dairy) कर्मचाऱ्यांनी संपावर जाण्याचा निर्धार पक्का केला असून आज (सोमवारी) काय ते स्पष्टपणे सांगा, असे निर्वाणीचे सांगूनही डेअरी प्रशासनाकडून (Administration) कोणतीच प्रतिक्रिया आली नसल्याने बुधवारी 8 ते शुक्रवारी 10 असे तीन दिवस संपावर जाण्याचा निर्धार डेअरी कर्मचारी संघटनेने केला आहे.

डेअरीच्या एका कर्मचारी संघटनेने संपावर जाण्याचा निर्धार केला आहे, तर दुसऱ्या कर्मचारी संघटनेने याबाबत कोणताच निर्णय न घेतल्याने या संपाचे होणार काय, असाही सवाल उपस्थित होत आहे. तरीही संप रोखण्यासाठी उद्या मंगळवारचा एक दिवस डेअरी व्यवस्थापनाच्या हाती आहे.

मागण्‍या मान्‍य होणार का?

गोवा डेअरीच्या कर्मचाऱ्यांना सातवा वेतन आयोग लागू करणे तसेच डिएरनेस अलावन्स लागू करणे या दोन मागण्यांसाठी संघटनेने संपाचे हत्यार उपसले आहे. या दोन्ही मागण्या मान्य करण्‍यासाठी 6 तारखेपर्यंत मुदत दिली होती. मात्र, व्यवस्थापनाने काहीच सांगितले नसल्याने संपाशिवाय पर्याय नाही, असे कामगारांनी म्हटले आहे.

...तर संपाचा निर्णय रद्द

कर्मचारी संघटनेचे नेते अजीतसिंह राणे यांनी आज (सोमवारी) बैठक घेऊन संपाबाबत मार्गदर्शन केले आहे. कामगारांच्या रास्त मागण्या मान्य केल्या, तर संपाचा निर्णय रद्द करू अन्यथा मागण्यांसाठी संपाशिवाय पर्याय नाही, असे मत अजीतसिंह राणे यांनी व्यक्त केले आहे.