शहरात रहदारीस अडथळा कराल, तर खबरदार..! अशी कडक तंबी देत, डिचोली पालिकेने अखेर ‘त्या’ पदेरांना तेथून हटवले. शहरात गर्दीच्या ठिकाणी उभे राहून पावविक्री करणाऱ्या आणि रहदारीस अडथळा निर्माण करणाऱ्या ‘पदेरां’वर कारवाई करणार असे संकेत पालिकेने आठ दिवसांपूर्वीच दिले होते. गेल्या 27 ऑगस्ट रोजीच्या दै. ‘गोमन्तक’मधून तत्संबंधीचे वृत्त प्रसिद्ध झाले होते.

शहरात सध्या ‘पदेरां’ची संख्या वाढली आहे. सायकल किंवा मोटारसायकलवर पाटे लावून हे ‘पदेर’ रोज सकाळ-संध्याकाळ बाजार परिसर मिळून शहरातील विविध ठिकाणी पावविक्री करताना आढळून येतात.

शहरात पदेरांची संख्या वाढत असली आणि विविध ठिकाणी पदेर आपला व्यवसाय करीत असले, तरी शहरातील न्यायालय इमारतीजवळून बाजारात जाणाऱ्या रस्त्यावरील वळणावर उभे राहून पावविक्री करणाऱ्या काही पदेरांमुळे मोठा धोका निर्माण झाला होता. या पदेरांमुळे रहदारीस अडथळा निर्माण होत असे.

बहुतेकजण तर मध्येच वाहने उभी करून पाव खरेदी करीत होते. त्यामुळे रहदारीस अडथळा निर्माण होत होता.

‘पदेरां’चा मोर्चा आता सुरक्षित ठिकाणी

रस्त्यावर व विशेषतः वळणाच्या ठिकाणी थांबून पाव विक्री करणाऱ्या पदेरांमुळे यापूर्वी लहान-सहान अपघात घडले होते. हा धोका ओळखून पालिकेने रस्त्यावरील विक्रेत्यांना कारवाईची कडक ताकीद देऊन तेथून हटवले आहे. यामुळे या विक्रेत्यांनी आता सुरक्षित ठिकाणी आपला मोर्चा वळवला आहे.