Water Sports in Goa: बायणा समुद्रात ‘वॉटर स्पोर्ट्‌स बोट’ नौकेत जादा प्रवाशांना घेऊन नौकेतील सर्वांचा जीव धोक्यात घालण्याचे कृत्य केल्याप्रकरणी हार्बर कोस्टल सिक्युरिटी पोलिसांनी तिघांना अटक केली.

त्या नौकेत (बोट) अधिकच्या 15 प्रवाशांना घेऊन बायणा समुद्रात गेल्याचे कळताच पोलिसांनी ही कारवाई केली.

हार्बर कोस्टल पोलिस स्थानकाचे निरीक्षक प्रदीप वेळीप यांनी दिलेल्या माहितीनुसार, या प्रकरणात पोलिस हवालदार रवींद्र धुरी यांनी तक्रार दिल्यानंतर कारवाई करण्यात आली.

शुक्रवारी दुपारी 12.50 च्या सुमारास प्रकाश शंकर राठोड (रा. बार्देश), कुशल मदलापूर (वय 22, रा. कांदोळी) आणि हनुमन्ता लमाणी (35, रा. कांदेळी) नामक संशयित एम. व्ही श्री रेणुका 1 नौकेतून (बोट) जादा प्रवाशांना घेऊन ''बेट आयलॅण्ड'' समोरील समुद्रात गेल्याची माहिती पोलिसांना मिळाली.

पोलिसांनी तपासणी केली असता, त्या नौकेतून 60 प्रवाशांना समुद्रात नेल्याचे स्पष्ट झाले. त्यामुळे तिघांविरुद्ध गुन्हा नोंद करून त्यांना अटक केली.