नवतारा येथे हाॅटेलमध्ये मॅनेजर म्‍हणून काम करणारा आणि सुमारे दोन किलोहून अधिक वजनाचा अमलीपदार्थ जवळ बाळगल्‍याचा आरोप असलेल्‍या अभिषेक संजय चौधरी या आरोपीचा जामीन अर्ज मडगावच्‍या सत्र न्‍यायालयाने फेटाळून लावला.

अभिषेक संजय चौधरी या आरोपीला 2 ऑगस्‍ट 2023 रोजी मध्‍यरात्रीनंतर छापा मारुन अटक केली होती. या आरोपीची झडती घेतली तेव्‍हा त्‍याच्‍याकडे दोन किलो वजनाचा गांजा, 5 ग्रॅम मेथाम्‍फेटामाईन जप्‍त करण्‍यात आला होता. या पदार्थांची बाजारातील किंमत सुमारे 2 लाख 50 हजार इतकी होते. या आरोपीला त्‍याच दिवशी अटक करण्‍यात आली होती.

या प्रकरणातील आरोपी हा बिगर गोमंतकीय असून जामिनावर साेडल्‍यास तो फरारी होण्‍याची शक्‍यता नाकारता येत नसल्‍याचा युक्‍तीवाद सरकारी वकील व्‍ही. जी. कॉस्‍ता यांनी केला होता. न्‍या. आगा यांच्‍या न्‍यायालयाने दोन्‍ही पक्षांचा युक्‍तीवाद ऐकून घेतला आणि तपास यंत्रणेला अवधी दिला पाहिजे असे सांगून या प्रकरणातील आरोपीचा जामीन अर्ज फेटाळून लावला.