पणजी: गोवा प्रदेश आम आदमी पक्षाच्या प्रभारी आणि दिल्लीच्या माजी मुख्यमंत्री आतिषी यांनी अलीकडेच 'दैनिक गोमंतक'ला दिलेल्या एका मुलाखतीत गोव्याच्या राजकारणाबद्दल महत्त्वपूर्ण भाष्य केले आहे. या मुलाखतीत त्यांनी आम आदमी पक्ष सामान्य नागरिकांचा कसा आहे, याचा पुनरुच्चार करताना स्वतःबद्दल काही थक्क करणारे खुलासे केले आहेत.

आतिशी यांनी स्पष्ट केले की, आम आदमी पक्ष आगामी निवडणुकीत गोव्यातील सामान्य जनतेला तिकीट देईल. त्या म्हणाल्या, "आम आदमी पक्ष हा सामान्य माणसांचा आहे. केवळ आमदार होऊन स्वतःच्या कमाईमधून घर आणि पक्ष असे दोन्ही सांभाळता येत नाही. त्यामुळेच हा पक्ष सामान्य माणसांना संधी देतो." आणि हे सांगताना त्यांनी स्वतःचे उदाहरण समोर ठेवले.

राजकीय पार्श्वभूमी नाही, आजही भाड्याचे घर

आपल्या राजकीय पार्श्वभूमीबद्दल बोलताना आतिषी म्हणाल्या, "मी काही मोठ्या राजघराण्यातून किंवा राजकीय पार्श्वभूमी असलेल्या घरातून आलेली नाही." त्यांचे आई-वडील दिल्ली विद्यापीठात प्राध्यापक होते. स्वतः दिल्लीत मंत्री आणि मुख्यमंत्री देखील राहिलेल्या आतिषी यांनी यावेळी एक मोठा खुलासा केला.

त्या म्हणाल्या, "मी स्वतः आजही भाड्याच्या घरात राहते." त्यामुळे आम आदमी पक्षातील लोक कोणत्याही मोठ्या राजकीय किंवा आर्थिक पाठबळाशिवाय सर्वसामान्य जनतेसाठी काम करतात, यावर त्यांनी भर दिला. या वक्तव्यावरून 'आप' पक्ष आगामी गोवा विधानसभा निवडणुकीत सामान्य आणि मध्यमवर्गीय उमेदवारांना संधी देण्याची शक्यता आहे. या मुलाखतीमुळे गोव्याच्या राजकारणात 'आप'च्या प्रतिमेबद्दल नवा संदेश गेला आहे.