मडगाव : मंत्री आणि आमदारांना कमिशन द्यावे लागत असल्यानेच सरकारी कामाच्या दर्जावर परिणाम होतोय. हे ‘कमिशनराज’ बंद करण्यासाठी सर्वांनी संघटित प्रयत्न करण्याची गरज आम आदमी पक्षाचे आमदार व्हेंझी व्हिएगस आणि क्रुझ सिल्वा यांनी व्यक्त केली. आपच्या या पत्रकार परिषदेत सरकारच्या धोरणांवर टीकास्त्र सोडण्यात आलं आहे.

बाणावली येथे आपचे आमदार (MLA) वेंझी व्हिएगस आणि क्रूझ सिल्वा या दोघांनी संयुक्त पत्रकार परिषद घेतली. त्यावेळी त्यांनी सत्ताधारी भाजपवर (BJP) जोरदार निशाणा साधला. कमिशनराज बंद करण्याचा प्रयत्न आम्ही बाणावली मतदारसंघातून सुरू केला आहे आणि त्याला लोकांकडून प्रतिसादही चांगला मिळत आहे असे सांगितले.

कमिशनराज संपवण्याची हीच पद्धत आता वेळ्ळी मतदारसंघातही राबविली जाईल असे वेंझी व्हिएगस यांनी स्पष्ट केले. तर, सिल्वा यांनी कामाचे पैसे मिळण्यापूर्वीच मंत्री आणि आमदारांना लाच द्यावी लागते, यासाठी कित्येक गोमंतकीय युवक सरकारी कामाची कंत्राटे घेण्यास तयार होत नाहीत असे सांगितले. आता आपच्या (Aam Aadmi Party) या आरोपांवर भाजपकडून काय प्रतिक्रिया येते हे पाहणं महत्त्वाचं ठरणार आहे