फोंडा : फोंड्यातील (Ponda) विकासकामांबाबत अनेक समस्या असून या समस्यांना वाचा फोडणारा कुणीच वाली नाही. फोंडा पालिका असून नसल्यासारखी झाल्‍याचा आरोप आम आदमी पक्षाचे (Aam Aadmi Party) उपाध्यक्ष ॲड. सुरेल तिळवे यांनी पत्रकार परिषदेत केला. फोंड्यात अनेक ज्‍वलंत समस्या स्‍थानिकांना भेडसावत आहेत. त्‍या दूर करण्यासाठी मतदारसंघातील सरपंच, पंचसदस्य, नगराध्यक्ष व नगरसेवकांनी त्वरित प्रयत्न करावेत. प्रलंबित विकासकामे आधी हाती घ्या, अशी मागणी सुरेल तिळवे यांनी केली.

नगरसेवक अविश्‍वासात मग्‍न!

फोंडा येथे आयोजित पत्रकार परिषदेला भानुदास नाईक, सेबी रॉड्रिगीस, सुकेंदू रेड्डी यांच्‍यासह अन्‍य मान्‍यवर उपस्थित होते. सुरेल तिळवे म्हणाले की, फोंडा पालिकेत सध्या संगीत खुर्चीचा खेळ सुरू असून फोंड्याचे नगरसेवक एकमेकांविरुद्ध अविश्‍वास ठराव आणण्यात गुंतले आहेत. सत्तेसाठी एकमेकांना पळवण्याचे आणि इकडून तिकडे उड्या मारण्याचे प्रकार घडत असून लोकशाहीची ही थट्टा असल्याचे ‘आप’ने म्हटले आहे. विकासकामांच्याबाबतीत फोंड्यातील नगरसेवक अपयशी ठरले असून सध्या फोंड्याला कुणी वालीच राहिला नसल्याचेही सुरेल तिळवे म्हणाले.

समस्‍या ढिगभर

फोंड्यात पार्किंग विषय, कचऱ्याचे मुद्दे, मलनिस्सारण प्रकल्प, तसेच खड्डेमय रस्ता हे महत्त्वाचे विषय प्रलंबित आहेत. मात्र, त्‍यांच्‍याकडे पालिकेचे अजिबात लक्ष नाही. विक्रेत्यांकडून अडवण्यात आलेले रस्ते आणि फुटपाथ याकडे पालिकेने दुर्लक्ष केले असून बाजारात जाणेही सध्या मुश्‍किलीचे ठरल्याचे सुरेल तिळवे म्हणाले. नगरसेवकांत सध्या फोडाफोडीचे राजकारण चालले आहे. सेबी रॉड्रिगीस यांनी लोक उघड्यावर शौचविधी करून परिसर अस्‍वच्छ करीत असल्याने सांगितले.