पणजी: दिव्यांग सशक्तीकरणासाठी आयोजित करण्यात येत असलेल्या पर्पल फेस्ट या महोत्सवासाठी अभिनेते आमीर खान यांची भेट घेण्यासाठी दिव्यांग सशक्तीकरणमंत्री सुभाष फळदेसाई त्यांना भटले असता दोन तास आमीर खान यांनी त्यांच्यासाठी दिले. पर्वरी येथे पत्रकारांशी बोलताना फळदेसाई यांनी हा अनुभव सांगितला.

ते म्हणाले, यंदाच्या पर्पल फेस्टसाठी केंद्रीय आरोग्यमंत्री जे. पी. नड्डा यांनीही येण्याचे कबूल केले आहे. आमीर खान यांना निमंत्रित करण्यासाठी भेट घेतली तेव्हा ते दोन तास देतील याची कल्पना नव्हती. पर्पल फेस्ट दरम्यान राबवण्यात येणारे उपक्रम आणि दिव्यांग सशक्तीकरणासाठी सरकारी पातळीवर करण्यात येणारे प्रयत्न याची माहिती त्यांनी घेतली.

यासाठी त्यांनी दोन तास दिले हे भेट आटोपती घेताना लक्षात आले. एवढ्या मोठ्या अभिनेत्याने सामाजिक कार्यासाठी एवढा वेळ द्यावा हे विरळच. इतरांनाही आदर्शवत. त्यांच्या निवासस्थानी हा वार्तालाप झाला.

आमीर खान यांनी स्वतः येण्याचे कबूल केलेच पण त्यांनी सितारे जमीन पर या चित्रपटातील कलाकारांनाही पर्पल फेस्टमध्ये सहभागी होण्याचे तेथूनच दूरध्वनीवर आवाहन केले. ९ ते १२ ऑक्टोबर दरम्यान होणाऱ्या या महोत्सवात ३० देशांचे प्रतिनिधीही येणार आहेत. राज्याचे दिल्लीतील निवासी आयुक्त या दरम्यान गोव्यात येणार आहेत.