Goa AAP Crisis : जिल्हा पंचायत निवडणुकीत गोव्यात आम आदमी पक्षाला लोकांकडून न मिळालेला प्रतिसाद आणि त्या पार्श्वभूमीवर पक्षाचे राज्य कार्यकारिणी अध्यक्ष अमित पालेकर यांच्यावर केलेली कारवाई, आणि त्यानंतर पालेकर यांच्यासह पाच नेत्यांनी दिलेला पक्ष सदस्यत्वाचा राजीनामा. या साऱ्या घटना पाहता आम आदमी पार्टी गोव्यासाठी नवा राजकीय पर्याय म्हणून पक्षाने जी प्रतिमा तयार करण्याचा सुरू केलेला प्रयत्न केविलवाणा ठरला आहे. हा सर्व घटनाक्रम पक्षाची वाढ खुंटवणारा ठरण्याची शक्यता व्यक्त केली जात आहे.

‘आप’ला गोव्यात लागलेल्या या गळतीचे कारण पक्षाचे दिल्लीतील नेतृत्व असल्याची भावना पक्ष कार्यकर्त्यांमध्ये बळावली आहे. ‘आप’ची गोव्यात राबवली गेलेली दिल्लीस्थित धोरणे सध्या गोव्यात त्यांना मारक ठरत आहेत.

‘आप’च्या धोरणाबद्दल आपले मत व्यक्त करताना राजकीय विश्‍लेषक प्रभाकर तिंबले म्हणाले, ‘आप’ हा राष्ट्रीय पक्ष असून राजकीय पक्षांना मिळालेला राष्ट्रीय दर्जा सांभाळून ठेवण्यासाठी अशा पक्षांना निवडणुकीत काही टक्के मते मिळवावी लागतात. ही मतांची टक्केवारी डोळ्यांसमोर ठेवून ‘आप’ने गोव्यात ‘एकला चलो’ हे धोरण राबवले असण्याची शक्यता नाकारता येत नाही. मात्र यावेळी त्यांचा हा निर्णय त्यांच्या अंगलट आला असेच म्हणावे लागेल.

दिल्लीत निर्णयांमुळे कार्यकर्ते नाराज

जिल्हा पंचायत निवडणुकीच्या तोंडावर असताना ‘आप’चा राजीनामा दिलेले रामराव वाघ यांनीही या गळतीसाठी केंद्रीय नेतृत्वाला जबाबदार धरताना, गोव्यातील कार्यकर्त्यांची मते विचारात न घेता आणि गोव्यातील नेत्यांना विश्वासात न घेता केंद्रीय नेत्यांनी परस्पर दिल्लीत बसून निर्णय घेण्याचे सत्र आरंभल्यामुळेच स्थानिक कार्यकर्ते पक्षावर नाराज झाले होते. हे सामूहिक राजीनामे त्याच नाराजीचा भाग आहे, असे ते म्हणाले.