Colvale Police Arrests Accused: अहमदनगर येथील 16 वर्षीय अल्पवयीन मुलीचे अपहरण करणाऱ्या 23 वर्षीय युवकाला गोव्यातून अटक करण्यात आली आहे. युवराज उर्फ सोन्या कोटकर असे या संशयित आरोपीचे नाव आहे. कोलवाळ पोलिसांनी त्याला अटक केली आहे.

महाराष्ट्रातील अहमदनगरच्या तोफखाना पोलिस स्टेशनमधील अधिकाऱ्यांनी विश्वसनीय सूत्रांच्या हवाल्याने याबाबतची माहिती गोवा पोलिसांनी दिली होती.

युवराज कोटकर याने 16 वर्षीय मुलीचे अपहरण केले होते. तो सध्या कोलवाळ भागात राहत होता. गोवा पोलिसांना ही माहिती मिळाल्यानंतर उत्तर गोव्याचे पोलिस अधीक्षक निधीन वाल्सन, म्हापसाचे एसडीपीओ जिवबा दळवी यांच्या देखरेखीखालील पथकाने युवराज कोटकर याला अटक केली.

कोलवाळ पोलिस स्टेशनचे पोलिस निरीक्षक विजय राणे यांनी या पथकाचे नेतृत्व केले. या पथकात पोलिस उपनिरीक्षक कुणाल नाईक, कॉन्स्टेबल संदीप मलिक आदींचा समावेश होता.

कोलवाळ भागात पाहणी करून युवराज कोटकर याला चिखलीतून ताब्यात घेतले. आणि अपहरण झालेल्या मुलीची सुटका केली. संशयित कोटकर याच्यासह संबंधित मुलीला अहमदनगरच्या अँटी ह्युमन ट्रॅफिक युनिटचे पोलिस उपनिरीक्षक बाळासाहेब शिंदे यांच्या ताब्यात देण्यात आले आहे.