Vagator Beach Accident: वागातोर किनाऱ्यावरील खडकावर सेल्फी काढण्याच्या नादात एक युवक बुडाल्याची भीती व्यक्त केली जात आहे.

अर्जुन कुमार (२२, रा. नेरुल व मूळचा गोरखपूर, उत्तर प्रदेश) असे समुद्रात बुडालेल्या या युवकाचे नाव आहे. ही घटना आज दुपारी २.३० ते ३ च्या सुमारास घडली.

अर्जुन हा आपला मेव्हुणा व मित्रासोबत ‘स्मॉल वागातोर’ येथील किनाऱ्यावर आला होता. समुद्र खवळलेला असल्याने येथील जीवरक्षकांनी या तिघांना खडकावरून खाली उतरण्यास सांगितले होते.

मात्र, वेळेचे गांभीर्य व सूचनांकडे दुर्लक्ष केल्याने मोठी लाट आली आणि क्षणार्धात अर्जुन दिसेनासा झाला.

जीवरक्षकांनी चारवेळा या तिघांना खडकावरून खाली येण्यास सांगितले होते. मात्र, या तिघांनीही खडकावर वेळ काढला. यावेळी अचानक आलेल्या एका मोठ्या लाटेत अर्जुन पाय घसरून पडल्याने समुद्रात ओढला गेला व गायब झाला.

या घटनेची माहिती मिळताच जीवरक्षक, अग्निशमन दलाचे जवान तसेच पोलिस प्रशासनाने घटनास्थळी धाव घेतली व शोधकार्य राबविले. मात्र, सायंकाळी उशिरापर्यंत अर्जुनचा काहीच थांगपत्ता लागला नव्हता.

अर्जुन हा गेल्या मे मध्येच गोव्यात कामासाठी आला होता. घटनेवेळी अर्जुन सोबत त्याचा मेव्हुणा (बलिंदर कुमार) व त्याचा मित्र होता. अर्जुन हा फॅब्रिकेशनचे काम करायचा. रविवार असल्याने हे तिघेही येथे फिरण्यासाठी व समुद्रस्नान करण्यासाठी आले होते.

जीवरक्षकांच्या सूचनांकडे दुर्लक्ष

अशा दुर्घटना घडू नयेत यासाठी धोकादायक ठिकाणी पर्यटकांना प्रवेश बंद केला आहे, पण अनेकजण सूचनांकडे दुर्लक्ष करतात. मध्यंतरी केरी - पेडणे येथील समुद्रात बुडून मृत्युमुखी पडलेल्या चौघांनी प्रतिबंधीत क्षेत्रात प्रवेश केला होता.

सेल्फी घेण्याच्या नादात आलेल्या मोठ्या लाटेने चौघांनाही ओढून नेले होते आणि त्यांना आपला जीव गमवावा लागला होता.