Goa Crime News:

सांगे येथील एका महिलेची गेले वर्षभर सतावणूक होत असूनही, तसेच याप्रकरणी तब्‍बल पाच वेळा सांगे पोलिस स्थानकात तक्रार करूनही प्रत्येक वेळी पोलिसांनी अदखलपात्र गुन्हा नोंदवून ‘सिडनी’ नामक युवकाला एकप्रकारे पाठीशीच घातले आहे.

त्‍यामुळे त्‍याचे आणखीच फावले. अखेर हे प्रकरण उपजिल्हाधिकारी न्यायालयात पोहोचले. तेथील काम संपवून बाहेर येताच आपल्याला सिडनी मोंतेरो याने (रा. कासावली) मारहाण केल्याची तक्रार सोफिया मास्कारेन्‍हस या महिलेने आज सांगे पोलिस स्थानकाबाहेर पत्रकारांशी बोलताना केली.

सोफिया म्हणाल्या की, गेले वर्षभर सिडनी हा युवक माझी सतावणूक करत आहे. शिवीगाळ करणे, माझ्‍या मुलींना धमकावणे एवढ्यावरच न थांबता आता तर मारहाण करण्‍यापर्यंत त्‍याची मजल गेली आहे. यावेळी त्‍यांनी मारहाणीचे वळ पत्रकारांना दाखविले.

दुसरीकडे पोलिस निरीक्षक प्रवीण गावस यांनी सांगितले की, सिडनी याला अटक करून त्‍याच्‍याविरोधात गुन्‍हा नोंद करण्‍यात आला आहे.

दरम्यान, याच प्रकरणावरून स्थानिक नगरसेवक मेशू डिकॉस्‍टा यांनी गावातील महिलांना पाठिंबा दिल्यामुळे त्यांना या प्रकरणात गोवून अटक करण्यासाठीच समन्स पाठविण्‍यात आले. त्‍यामुळे शंभरेक नागरिक तसेच महिलांनी सांगे पोलिस स्थानकात धाव घेऊन याप्रकरणी पोलिसांना जाब विचारला.

त्‍यावर पोलिस निरीक्षक गावस यांनी सांगितले की, ही दोन्ही प्रकरणे वेगवेगळी आहेत. पोलिसांनी दोन्ही प्रकरणी तक्रार दाखल करून घेऊन उद्या सकाळी संबंधितांना पोलिस स्थानकात बोलाविले आहे.