Goa News :

कुकळ्ळी, हिंदू-ख्रिस्ती भाविकांचे श्रद्धास्थान असलेल्या देवी श्री शांतादुर्गा कुंकळ्ळीकरीणीचा वार्षिक छत्रोत्सव शनिवारी (ता. ३०) होणार आहे.

यावेळी शेकडो भाविक गुलालाची उधळण करीत, ढोल ताशाच्या गजरात बारा छत्र्या नाचवत गुलाल अर्पण करत मिरवणुकीत सहभागी होणार आहेत.

दुपारी दीड वाजता देवीच्या पालखी मिरवणुकीला फातर्पा येथून सुरवात होणार आहे. दुपारी बारा वाजता धार्मिक विधी झाल्यावर भक्त देवीला गुलाल अर्पण करून आनंदोत्सवात सहभागी होणार आहेत.

यावेळी भक्तांतर्फे बारा छत्र्या नाचवत ढोल ताशाच्या गजरात देवीचा जयजयकार करीत देवीची पालखी मिरवणूक पारंपरिक गोविंद घाटी मार्गाने मल्लागिणी, जुझेंगाळ, सिद्धनगर, नायगिलो, भिवसा, व्होडी या मार्गाने मूळस्थानी तळयेभाट येथे येणार आहे. भक्त वेगवेगळ्या ठिकाणी देवीचे स्वागत करून देवीला नारळ ओटीची भेट अर्पण करून देवीचे आशीर्वाद घेणार आहेत.

देवी शांतादुर्गा कुकळ्ळीकरीण संस्थानला मोठी परंपरा व इतिहास आहे. सोळाव्या शतकाच्या सुरवातीला पोर्तुगीज सत्तेने राज्यात धर्मातरण सुरू केले, तेव्हा स्वधर्म व स्वराज्यासाठी कुंकळ्ळीकरांनी मोठा लढा दिला.

त्यावेळी धर्मरक्षणासाठी फातर्पा या सुरक्षित ठिकाणी देवीची मूर्ती हलविण्यात आली होती. तेव्हापासून फातर्पा येथे देवी स्थापित करण्यात आली. तेव्हा देवीने भक्तांना दृष्टात देऊन फाल्गुन पंचमीला आपल्याला मूळस्थानी तळयेभाट येथे बारा वांगड्यांच्या उपस्थितीत वाजत गाजत बारा छत्र्या नाचवत नेण्याचे फर्मान काढल्याचे सांगण्यात येते. गेली साडेचारशे वर्षे ही परंपरा अखंडपणे चालू आहे.

ख्रिस्ती भाविकांकडूनही मंडप घालून स्वागत

हिंदूंबरोबरच ख्रिस्ती भाविकही या उत्सवात मोठ्या उमेदीने भाग घेतात. हिंदू - ख्रिस्ती धार्मिक सलोख्याची मिसाल असलेला हा उत्सव मोठ्या धुमधडाक्यात साजरा करण्यात येणार आहे.

ख्रिस्ती भाविकही हिंदू भाविकाप्रमाणे डोक्यावर फेटा बांधून छत्र्या नाचवत मनसोक्तपणे गुलालाची उधळण करण्यात धन्यता मानतात. ज्या ख्रिस्तीबहुल भागातून देवीची पालखी जाते तेथे ख्रिस्ती भाविक खास मंडप घालून देवीचे स्वागत करतात.