Goa Accident: रस्तात पडलेल्या भगदाडामध्ये चाक अडकून जांभ्या विटांची वाहतूक करणारा ट्रक भररस्त्यात उलटला. पणजीतील मध्यवर्ती परिसरात ही घटना घडली आहे. काकुलो मॉल परिसरात ही घटना आज दुपारी 2 च्या सुमारास घडली असून या घटनेत 4 कामगार गंभीर जखमी झाले आहेत.

मागील पाच ते सहा महिन्यांपासून या रस्त्याचे काम सुरू आहे. रस्त्याचे दोन्ही बाजूंनी खोदकाम केले आहे. अपघात घडला त्यावेळीही सदर काम सुरु असून कामावर असलेले कर्मचारी यात गंभीर जखमी झाले आहेत. जखमींना तातडीने रुग्णालयात हलवण्यात आले आहे.

गेल्या काही महिन्यांपासून या रस्त्याचे काम सुरू आहे. सध्या हा रस्ता वाहतुकीला बंद करण्यात आला आहे. या ट्रकची पुढची काच फुटली असून ट्रक पुर्णपणे खड्ड्यात कलंडला आहे. ट्रकमधील विटाही खड्ड्यात पडल्या आहेत. ट्रकची एक बाजू पुर्णतः खड्ड्यात आहे. हा ट्रक बाहेर काढण्याचे प्रयत्न आता सुरू झाले आहेत.

दरम्यान, पणजीचे महापौर रोहित मोन्सेरात यांनी घटनास्थळी भेट देत पाहणी केली. बॅरेकेडिंग करून हा रस्ता वाहतुकीस बंद केला आहे. या ट्रकमधील साहित्य स्मार्ट सिटी योजनेतील कामासाठी नेले जात होते का, असे विचारल्यावर मोन्सेरात यांनी याबाबत कल्पना नसल्याचे सांगितले.