Mini Bus Accident: पकडापकडीचा खेळ खेळताना अचानक बससमोर आलेल्या आपल्या तीन वर्षांच्या भावाला वाचवताना 10 वर्षांच्या बहिणीचा बसच्या चाकाखाली येऊन दुर्दैवी अंत झाल्याची हृदयद्रावक घटना पाजीफोंड येथे आज, बुधवारी दुपारी घडली. विशेष म्हणजे, गुजरातचे हे अन्सारी कुटुंबीय आजच गोव्यात दाखल झाले होते.

पाजीफोंड येथे बुधवारी दुपारी पावणेबाराच्या सुमारास घटना घडली. अमिनाखातून अन्सारी असे मृत मुलीचे नाव असून ती मूळ गुजरात राज्यातील सूरत येथील रहिवासी आहे. अमिनाचे वडील ई. अहमद हे आपल्या कुटुंबीयांसमवेत आजच गोव्यात आले होते. उदरनिर्वाहासाठी हे कुटुंबीय आपल्या अन्य एका ओळखीच्या कुटुंबीयांसमवेत गोव्यात आले होते.

पकडापकडीचा खेळ बेतला जीवावर

कुटुंबातील सदस्य टपरीवर चहा पित असताना अमिना, तिची एक बहीण व भाऊ तसेच दुसऱ्या कुटुंबातील एक तीन वर्षीय मुलगा हे पकडापकडीचा खेळ खेळत होते. खेळतानाच तिचा भाऊ रस्त्यावर आला. त्याचवेळी समोरून मिनी बस येत होती.

ती बघून भावाला वाचविण्यासाठी अमिना धावली आणि बसच्या पुढच्या चाकाखाली सापडून गंभीर जखमी झाली. दक्षिण गोवा जिल्हा इस्पितळात नेले असता, डॉक्टरांनी तिला मृत घोषित केले. तिचा भाऊही बसखाली अडकला. सुदैवाने त्याला इजा झाली नाही.