Kadamba Transport: दारू पिऊन कदंब बस चालविणाऱ्या चालकाचा परवाना निलंबित केला जाईल, सध्या त्याला सेवेतून निलंबित करण्यात आले आहे, असे मुख्यमंत्री प्रमोद सावंत यांनी शुक्रवारी दिली. कदंब परिवहन महामंडळाची पणजी ते वाळपई प्रवासी घेऊन जाणारा बसचालक एल्विस रॉड्रिग्स (वय ४९), रा. जुने गोवे हा मद्याच्या धुंदीत होता.

सायंकाळी तो नशेमध्ये बस घेऊन जात होता, त्याने बसमधील प्रवाशांचा जीव धोक्यात टाकला होता. कदंबा पठारावर प्रवाशांनी ही बस त्या चालकाला थांबवायला भाग पाडले आणि सर्व प्रवासी त्यातून खाली उतरले.

नशेत वाहन चालवल्याप्रकरणी चालक एल्विसविरोधात जुने गोवे पोलिसांत तक्रार दाखल झाली असून त्याला पोलिसांनी तत्काळ ताब्यात घेतले होते.

दरम्यान, या चालकाला सेवेतून निलंबित करण्यात आले असून, अशाप्रकारे दारू पिऊन वाहन चालविणाऱ्यांवर कारवाई केली जाईल, असे मुख्यमंत्र्यांनी पणजीतील एका कार्यक्रमास उपस्थिती लावली. त्या कार्यक्रमानंतर पत्रकारांनी विचारलेल्या प्रश्‍नावर त्यांनी वरील प्रतिक्रिया दिली.