Chandel Water Treatment Plant: चांदेल येथील जल प्रकल्पात (मंगळवारी) झालेली क्लोरीन गॅस गळती पेडणे अग्नी शमन दलाने वेळीच आटोक्यात आणल्याने अनर्थ टळला. प्रकल्प अभियंते सागर कुमार यांनी दूरध्वनीवरुन पेडणे अग्नीशमन दलाला क्लोरीन गॅस गळतीची माहिती दिली.

पेडणे अग्निशमन दलाचे अधिकारी नामदेव परवार यांच्या नेतृत्वाखाली ऊप अधिकारी सुनील देसाई , दलाचे जवान राजन खरात, सहदेव परब व आशीर्वाद गाड , शाम आरोंदेकर , चालक मार्टीयस मेंडोझा या टीमसह घटनास्थळी दाखल झाले व ओपन सर्किट पॉझिटिव्ह प्रेशर कॉम्प्रेस्ड एअर ब्रीदिंग ऑपरेटस सेट चा वापर करून खास रसायनाचा वापर करून गॅस गळती आटोक्यात आणली. दूर अंतरापर्यंत या गॅसचा उग्र दर्प पसरला होता.

उलटी, डोळ्यांना त्रास

क्लोरीन वायू हा जल शुध्दीसाठी वापरण्यात येतो.पाण्यातील कचरा तळाला नेऊन शुध्द पाणी देण्याचे काम करते. मात्र, क्लोरीन विषारी असतो.त्याची बाधा झाल्यास उल्टी, डोळ्यावर व संपूर्ण आरोग्यावर दुष्परिणाम होऊ शकतात. अशा गळतीवेळी काळजीपूर्वक कृती करून गळती रोखावी लागत असल्याचे नामदेव परवार यांनी सांगितले.