Tisk Usgao : तिस्क-उसगांव येथील अळंबी पैदास करणाऱ्या कारखान्यातील हाणामारीत गंभीर जखमी झालेल्या कामगाराचा आज संशयास्पद मृत्यु झाला आहे. फोंडा पोलिसांनी मृतदेह शवचिकित्सा करण्यासाठी पाठविला आहे. शवविच्छेदन अहवालानंतरच मृत्युचे कारण स्पष्ट होणार आहे. याबाबत फोंडा पोलिस अधिक तपास करीत आहेत.

अधिक माहिती अशी की, राजन सहा (मूळ बिहार, वय 35) हा कामगार अळंबी पैदास करणाऱ्या उसगांव येथील फॅक्टरीत काम करीत होता. अन्य कामगारही या फॅक्टरीत काम करीत होते. शनिवार रात्री दोघा कामगारात बाचाबाचीवरून अखेर मारामारी झाली. त्यात राजन सहा हा मारहाणीत जखमी झाला होता. त्याला पिळये-तिस्क येथील हॉस्पिटलमध्ये उपचारांसाठी पाठविले होते.

जखम मोठी असल्याने त्याला पुढील उपचारांसाठी गोमेकॉत पाठविण्यात आले. रविवारी सायंकाळी गोमेकॉत हॉस्पिटलमधून आपल्या उसगांव येथील फॅक्टरीच्या रुममध्ये आला. सोमवारी सकाळी त्याला अस्वस्थ वाटू लागले, तेव्हा पुन्हा एकदा त्याला पिळये-तिस्क येथे उपचारांसाठी जाताना वाटेतच त्याचा संशयास्पद मृत्यू झाला.

फोंडा पोलिसांनी मृतदेह शवचिकित्सा करण्यासाठी पाठविला आहे. शवचिकित्सा रिपोर्ट आल्यानतर खून की संशयस्पद मृत्यू हे स्पष्ट होणार आहे. फोंडा पोलिसांनी संशयित म्हणून चुमनकुमार या कामगाराला ताब्यात घेतले आहे.