Goa Electricity Problem: वीज खात्याने काणकोण तालुक्याला चतुर्थीची सुमारे 84 कोटीची खास भेट दिली आहे. कुंकळ्ळी ते चार रस्ता उपकेंद्रापर्यंतची करमल घाट क्षेत्रातील ओव्हरहेड वीज वाहिनी बदलून भूमिगत वीज वाहिनी घालण्यासाठी 46 कोटी, तीन लाख 29 हजार रूपयांच्या खर्चाला मान्यता देण्यात आली आहे.

पैंगीण व लोलये पंचायत क्षेत्रात भूमिगत वीज वाहिन्या घालण्यासाठी 37 कोटी 97 लाख खर्चाला मंजुरी दिली आहे. या सबंधीची समंती वीज खात्याचे मुख्य अभियंता स्टिफन फर्नांडिस यांनी दिली आहे. करमल घाटातून घनदाट अरण्यातून कुंकळ्ळीहून ही ओव्हरहेड वीज वाहिन्यांद्वारे काणकोणला वीज पुरवठा होतो.

मात्र, पावसाळ्यात या वाहिन्यांवर झाडे उन्मळून पडल्यास अनेक तास काणकोणचा वीज पुरवठा ठप्प होतो.वीज कर्मचाऱ्यांनाही रात्रीच्या वेळी ही घटना घडल्यास तेथे जाणेही शक्य होत नव्हते. यापूर्वी गावडोंगरी व खोतीगाव पंचायत क्षेत्रात व पैगीण पंचायतीच्या काही भागात भूमिगत वीज वाहिन्या घालण्यात आल्या आहेत.

आता उर्वरित पैंगीण पंचायत क्षेत्रातील भागात व लोलये पंचायत क्षेत्र भूमिगत वीज वाहिन्यांनी जोडण्यात येणार आहे.त्यामुळे या भागातील खंडित वीज पुरवठ्याच्या समस्येवर कायमस्वरूपी तोडगा निघणार आहे. या पुढे पालिका क्षेत्र व आगोंद पंचायत क्षेत्रही भूमिगत वीज वाहिन्यांनी जोडण्यात येणार असल्याचे सभापती रमेश तवडकर यांनी सांगितले.