पणजी : मद्यसेवन करण्यात सुशेगाद गोंयकारच पुढे असल्याचं स्पष्ट झालं आहे. गोव्यात सर्वाधिक 59 टक्के पुरुष मद्याचं सेवन करत असून त्याखालोखाल 57 टक्के अरुणाचल प्रदेशमध्ये आणि 50 टक्के तेलंगाणामध्ये सेवन करत असल्याचं निरीक्षण राष्ट्रीय आरोग्य सर्वेक्षणात नोंदवण्यात आलं आहे.

सर्वात कमी मद्य सेवनाचं प्रमाण लक्षद्वीपमध्ये असून ते केवळ 1 टक्के असल्याचं सर्वेक्षणात नमूद करण्यात आलं आहे. राष्ट्रीय आरोग्य सर्वेक्षण 5 2019-20 मध्ये करण्यात आलं आहे. या सर्वेक्षणात गोव्यासह देशभरातील लोकांची मतं जाणून घेण्यात आली आहेत. गोव्यातील 21.3 टक्के महिलांनी आतापर्यंत शारीरिक किंवा लैंगिक छळाचा सामना केला आहे.

18 ते 49 वयोगटालीत 10 टक्के महिलांनी नवऱ्याकडून होणारा त्रास सहन केला आहे. इतकंच नाही तर स्वत:च्या मालकीचा मोबाईल फोन वापरण्यामध्येही गोव्यातील महिलाच आघाडीवर आहेत. गोव्यातील तब्बल 91 टक्के महिलांकडे स्वत:चा मोबाईल फोन असून त्यानंतर सिक्कीममध्ये 89 टक्के महिलांकडे स्वत:चा फोन असल्याचं सर्वेक्षणात नमूद करण्यात आलं आहे.