वाहतूक खात्याच्या म्हापसा कार्यालयाकडून नवीन मोटार वाहन कायद्यान्वये बार्देशात सुमारे 950 चालकांचा वाहन परवाना निलंबित केला. तर यंदा चालू वर्षात गेल्या दोन महिन्यांत तब्बल 400 जणांवर कारवाईचा बडगा उगारला.

बार्देश तालुक्यात मागील एप्रिल ते डिसेंबर या नऊ महिन्यांत 542 वाहनचालकांचे परवाने निलंबित करण्यात आले. तर यावर्षी वाहतूक पोलिस व वाहतूक खात्याने सध्या उल्लंघनकर्त्यांचा वाहनचालक परवाना निलंबित करण्यावर भर दिला आहे. दरम्यान, राज्यात एप्रिल 2022 पासून नवीन मोटार वाहन कायदा अमलात आला आहे.

उपलब्ध माहितीनुसार, गेल्या दोन महिन्यांत म्हणजे 59 दिवसांत 400 वाहनचालकांचे परवाने निलंबित केले. या सरासरीनुसार दिवसाला सहा ते सात वाहनचालकांचे परवाने निलंबित झालेत.

नेटवर्कअभावी लोकांची गैरसोय...

1) म्हापसा येथील आरटीओ कार्यालयातील इंटरनेट सेवा बंद राहिल्याने मागील दोन दिवस येथे येणाऱ्या लोकांची मोठी गैरसोय झाली व कामे खोळंबली. सूत्रांच्या माहितीनुसार, तांत्रिक समस्येमुळे राज्यातील इतरही सरकारी आस्थापनांत ही स्थिती उद्भवली होती.

2) सध्या आरटीओकडून सर्व सुविधा या ऑनलाइन केल्या आहेत. एकीकडे राज्य सरकार डिजिटलायझेशनच्या गप्पा मारते. मात्र, इंटरनेट सेवा अचानक ठप्प राहिल्याने लोकांची प्रचंड गैरसोय होते तसेच संबंधितांना मानसिक त्रास सहन करावा लागतो.

3) यासंदर्भात आरटीओ अधिकाऱ्यांनी सांगितले की, बुधवारी सकाळी ठप्प झालेली इंटरनेट सेवा ही दुपारी तीन वाजल्यानंतर सुरळीत झाली. मंगळवारीदेखील अशीच समस्या उद्भवली होती. तांत्रिक मुद्दा असल्याने आम्हीदेखील हतबल असतो, याकडे त्यांनी लक्ष वेधले.