मागचे दोन दिवस पडत असलेल्‍या संततधार पावसामुळे दक्षिण गोव्‍यात कित्‍येक ठिकाणी भूस्‍खलनाचे प्रकार घडले असून आज सकाळी मार्ले-बोर्डा येथे एका बंगल्‍याची कुंपणाची भिंत लगतच्या एका इमारतीवर पडल्‍याने या इमारतीतील चार सदनिकांची मोठ्या प्रमाणावर मोडताेड झाली.

घरात लोक असताना ही पडझड झाली. मात्र, हा प्रकार सकाळच्‍या वेळेस झाल्‍याने घरातील लाेकांनी घराबाहेर धाव घेतल्‍याने कुठलीही जीवितहानी झाली नाही.

मार्ले-बाेर्डा येथील रायेश चेंबर्स या इमारतीतील फ्‍लॅटवर ही दरड कोसळली. या दरडीबरोबर दगडी कुंपणही या इमारतीवर कोसळून पडल्‍याने या मातीच्‍या आणि दगडाच्‍या वजनाने फ्‍लॅटच्‍या भिंती कोसळल्‍या आणि मातीचा हा ढिगारा घरात शिरला. यातील एका सदनिकेच्‍या शयनकक्षाची मोठ्या प्रमाणावर नासधूस झाली आहे.

तक्रारीकडे दुर्लक्ष

डोंगराच्‍या पायथ्‍याशी ही इमारत असून हा डोंगर कापून तिथे एक बंगला बांधण्‍यात आला होता. या बंगल्‍यासाठीच ही कुंपणाची दगडी भिंत उभारण्‍यात आली होती. ही भिंत कोसळू शकते, अशी तक्रार गतवर्षी १२ एप्रिल रोजी जिल्‍हा प्रशासनाकडे केली हाेती. मात्र त्‍याची दखल घेतली गेली नाही. परिणामी आम्‍हाला ही हानी सोसावी लागली, अशी तक्रार येथील रहिवाशांनी केली.