पार्से पंचायतीमध्ये मावळत्या पंचायत मंडळाकडून एकूण 35 लाखांचा घोळ झाल्याची तक्रार पार्से ग्रामस्थांनी दक्षता खात्याकडे 30 मे रोजी तक्रार नोंदवलेली आहे. दरम्यान, आम्ही कसलाही घोटाळा केलेला नाही, असा दावा माजी सरपंच प्रगती सोपटे यांनी केला.

14व्या वित्त आयोगांतर्गत पंचायतीकडे काही निधी होता. तो कसा वापरावा यासाठी पंचायत मंडळाची बैठक झाली, आणि त्यानुसार ठरावाद्वारे सर्वानुमते निर्णय घेतला होता. त्यानुसार कोणते सामान खरेदी करावे, याची संमती घेतली होती. त्याला अधिकाऱ्यांनीही मंजुरी दिली होती,असे माजी सरपंच प्रगती सोपटे यांनी सांगितले.

पार्से पंचायतीने कुणाचीही संमती न घेता काही प्रमाणात सामान खरेदी केल्याचा दावा ग्रामस्थांनी केला. याविषयी नुकत्याच झालेल्या ग्रामसभेत याविषयी ठराव मंजूर करून या प्रकरणाची दक्षता खात्याकडून चौकशी करावी, अशी मागणी केली. त्यानुसार विद्यमान पंचायत मंडळाने ग्रामस्थांच्या वतीने दक्षता विभागाकडे चौकशीची मागणी केली आहे.

3.5 लाखांची खुर्ची खरेदी; पंचायतीत एकही नाही !

पार्सेच्या माजी पंचायत मंडळाने फोकस आणि वायर,असे वीज सामान सावंतवाडी येथून 15 लाख खर्चून आणल्याचे दाखवले. 14 लाखाचे कचरा विल्हेवाट सामान आणल्याची बिले सादर केली, आणि केवळ पंचवीस टक्के ग्रामस्थांना ती वितरित केली असतील.

शिवाय 3.5 लाखांच्या खुर्च्या खरेदी केल्याचे बिल आहे. परंतु पंचायतीकडे एकही खुर्ची नाही, असा दावा ग्रामस्थांनी केला आहे. काही ग्रामस्थांनी ‘आरटीआय’ अंतर्गत माहिती मिळवल्यानंतर हे प्रकरण उघड झाले आहे.