आगोंद-केरी येथील 4 हजार चौ.मीटर क्षेत्रात फैलावलेल्या शामराव नाईक गावकर यांच्या ऑर्किड बागायतीच्या पॉलिहाऊसला शनिवार, 11 रोजी सायंकाळी 7.30 वा.च्या दरम्यान आग लागून बेचिराख झाल्यामुळे प्रचंड नुकसान झाले.

एक तास परिश्रम करून काणकोण अग्निशमन दलाच्या जवानांनी 250 चौ.मीटर क्षेत्रात असलेले पॉलिहाऊस वाचविण्यात यश मिळविले. या आग दुर्घटनेत पॉलिहाऊसचे मालक शामराव देसाई यांना 33 लाख रुपयांचे नुकसान झाल्याचा प्राथमिक अंदाज आहे.

पॉलिहाऊसला लागूनच असलेल्या माळरानाला लागलेल्या आगीने हळू-हळू सुके गवत व नंतर पॉलिहाऊसवरील प्लास्टिकने पेट घेतल्यावर तेथील जलवाहिनी, पंप, ऑर्किडची रोपटी सर्व काही भस्मसात झाली, असे शामराव नाईक गावकर यांनी सांगितले.