पणजी: गोवा (Goa) वैद्यकीय महाविद्यालय (GMC) व सुपर स्पेशालिटी येथे मिळून 29 कोरोना (Covid-19) रुग्ण व्हेन्टिलेटरवर असल्याची माहिती गोमेकॉचे डीन डॉ. शिवानंद बांदेकर यांनी दिली आहे. सुपर स्पेशालिटीमध्ये 25 कोरोना रुग्ण आयसीयुमध्ये असल्याची माहिती तेथील डॉक्टरानी दिली. (29 corona patients are on ventilators In Goa)

राज्यात कोरोना नियंत्रणात येत असून गेल्या 14 दिवसात कोरोनामुळे होणाऱ्या मृत्यूंची संख्याही कमी झाली आहे. नवे कोरोनाबाधितही कमी प्रमाणात सापडत आहेत. गेल्या 14 दिवसात 71 कोरोनाबाधितांचे निधन झाले आहे. मे महिन्याच्या 11 तारखेला एकाच दिवशी 75 कोरोनाबाधितांना मरण आले होते. ही संख्या राज्यात एका दिवसातील सर्वात जास्त बळींची होती. त्यानंतर ती कमी कमी होत गेली.

जुलै महिन्यात तो नियंत्रणात येत आहे. जुलैच्या गेल्या सहा दिवसात 25 कोरोनाबाधितांचे निधन झाले. तर 1134 नवे कोरोनाबाधित सापडले आणि 1426 कोरोनाबाधित बरे झाले असून गेल्या चोवीस तासात 4 जणांचा बळी गेला.

"कोरोनामुळे गंभीर स्थिती झालेल्या रुग्णांना व्हेन्टिलेटरवर ठेवले जाते. गोमेकॉमध्ये सध्या 11कोरोना रुग्ण व्हेन्टिलेटवर असून सुपर स्पेशालिटीमध्ये 18 कोरोना रुग्ण व्हेंटिलेटर आहेत, असे एकूण 29 कोरोना रुग्ण या दोन्ही ठिकाणी व्हेंन्टिलेटरवर आहेत."

- डॉ. शिवानंद बांदेकर, डीन, गोमेकॉ.