Goa Police Loksabha Election

आगामी लोकसभा निवडणुकीच्या पार्श्वभूमीवर गोवा पोलिसांनी मोठी कारवाई केली आहे. पोलिसांनी 200 हून अधिक गुन्हेगार आणि असामाजिक घटकांविरोधात प्रतिबंधात्मक कारवाई केली.

गोवा पोलिसांकडून 238 अजामीनपात्र वॉरंट बजावण्यात आले असून, 16 मार्च ते 8 एप्रिल दरम्यान 41 परवानाधारक शस्त्रे जमा करण्यात आली आहेत.

प्रतिबंधात्मक कारवाईचा भाग म्हणून, 146 इतरांना CrPC च्या कलम 107 अंतर्गत सुरक्षा बॉन्ड सादर करण्याचे आदेश देण्यात आल्याचे उत्तर गोव्याचे पोलीस अधीक्षक अक्षत कौशल म्हणाले.

तसेच, CrPC च्या कलम 110 अंतर्गत 60 लोकांना सतर्क करण्यात आले आहे, तर 11 लोकांना CrPC च्या कलम 109 अंतर्गत सावध करण्यात आले आहे.

राज्यातील दोन्ही जिल्ह्यात जवळपास 100 गुन्हेगार असल्याची माहिती पोलिसांनी दिली आहे. पोलिसांनी गुन्हेगारांना पोलिस स्थानकात बोलवून गुन्हेगारी कृत्यांमध्ये सहभागी न होण्याची सूचना केली आहे.

निवडणूक काळात काही अनुचित प्रकार करण्याचा प्रयत्न केल्यास सक्त कारवाई केली जाईल, असा ताकीद वजा इशारा पोलिसांनी दिला आहे. सीमा भागातील तपासणी नाक्यावर कसून तपास केला जात असून, अमली पदार्थांच्या तस्करीवर लक्ष ठेवले जात असल्याची माहिती पोलिसांनी दिली आहे.

जिल्हाधिकाऱ्यांकडून आदेश आल्यानंतर याबाबत कारवाई करण्यात आली आहे.