Cannes Film Festival :

पणजी, चित्रपट जगतातील सर्वात भव्य मानल्या जाणाऱ्या कान्स चित्रपट महोत्सवाला दोन दिवसांपूर्वी मोठ्या उत्साहात सुरवात झाली. या महोत्सवाचे यंदाचे ७७ वे वर्ष असून यावर्षी होणाऱ्या ५५ व्या भारतीय आंतरराष्ट्रीय चित्रपट महोत्सवाच्या (इफ्फी) पोस्टरचे (भित्तीपत्रक) अनावरण झाले.

माहिती आणि प्रसारण मंत्रालयाचे सचिव संजय जाजू या पहिल्या वहिल्या ‘भारत पर्व महोत्सवा’त सहभागी झाले होते. प्रसारण मंत्रालयाचे सचिव संजय जाजू यांच्या हस्ते इफ्फीच्या पोस्टर्सचे अनावरणही झाले.

यावेळी चित्रपट निर्माते अशोक अमृतराज, रिची मेहता, गायक शान, अभिनेता राजपाल यादव, चित्रपटसृष्टीतील दिग्गज बॉबी बेदी हे मान्यवर देखील यावेळी उपस्थित होते.

माहिती आणि प्रसारण मंत्रालयाअंतर्गत राष्ट्रीय चित्रपट विकास महामंडळ अर्थात एनएफडीसीने फेडरेशन ऑफ इंडियन चेंबर ऑफ कॉमर्स अँड इंडस्ट्रीज अर्थात फिक्कीच्या सहकार्याने या कार्यक्रमाचे आयोजन केले होते.

या कार्यक्रमात गायिका सुनंदा शर्मा यांच्यासह, नवोदित गायिका प्रगती, अर्जुन आणि गायक शान यांचा मुलगा माही यांनी पंजाबी गीतांचे सादरीकरण केले. यानंतर सगळ्या गायकांनी सादर केलेल्या ‘माँ तुझे सलाम’ या गाण्याने कार्यक्रमाची जोषपूर्ण सांगता झाली.

उपस्थितांनी या गाण्याला टाळ्यांच्या कडकडाटाने दाद दिली. दहा दिवस चालणाऱ्या या चित्रपट महोत्सवात चित्रपटप्रेमींना आशय आणि ग्लॅमरचा मेळा अनुभवायला मिळणार आहे.

हा अत्यंत आनंदाचा क्षण

कान्स चित्रपट महोत्सवातील ‘भारत पॅव्हेलियन’मध्ये सहभागी होणे आनंददायी होते. हा अत्यंत आनंदाचा क्षण आहे. गेल्या वर्षी आम्ही या चित्रपटाचे चित्रीकरण करत होते, तेव्हा आम्ही पुढील वर्षी कान्समध्ये असू याची कल्पना नव्हती, असे अभिनेत्री मिता वशिष्ठ हिने सांगितले.