वेर्णा औद्योगिक वसाहतीच्या रस्त्यावरून पहाटे भरधाव वेगात जात असताना कारवरील नियंत्रण गेल्याने कार बाजूच्या दरीत पडून ज्युलियस फर्नांडिस या १८ वर्षीय युवकाचा मृत्यू झाला.

हा युवक देवटी-लोटली येथील असून पहाटे दोन वाजण्याच्या सुमारास तो कारने येत असताना या रस्त्यावर त्याचा वाहनावरील ताबा गेला आणि हा अपघात घडला, अशी माहिती वेर्णा पोलिसांनी दिली.

या अपघात स्थळाजवळ एक कारखाना असून या कारखान्यात काम करणाऱ्या कामगारांनी त्वरित पोलिसांशी संपर्क साधून त्यांना घटनास्थळी बोलावले.

घोगळ-बोलशेत 'थार' उलटली

घोगळ - मडगाव येथील बोलशे सर्कलजवळ आज एका चालकाचे गाडीवरील नियंत्रण गेल्याने थार जीप उलटली. सुदैवाने जीपचालकाला इजा झाली नाही.

दुसऱ्या घटनेत, १८ जुलै रोजी सकाळी ७.४५ वाजण्याच्या सुमारास आपल्या कारची फातर्पा येथे एका मोटारसायकलला धडक देऊन आनंद वेळीप (३१) आणि प्रशांत गावकर (३८) या दोघांना जखमी केल्याच्या आरोपाखाली कुंकळ्ळी पोलिसांनी कारचालक मिदानसाब नदाफ याला शुक्रवारी सायंकाळी अटक केली.