डिचोली: डिचोली परिसरातून एक १३ वर्षीय अल्पवयीन मुलगी बेपत्ता झाली असून, या मुलीचे अपहरण झाल्याचा संशय आहे. बेपत्ता मुलीच्या पालकांनीही तशी शक्यता व्यक्त करून डिचोली पोलिसात तक्रार केली आहे.

या तक्रारीला अनुसरून डिचोली पोलिसांनी भारतीय न्याय संस्थेच्या १३७ (२) आणि बाल हक्क कायद्याखाली गुन्हा नोंद केला आहे. याप्रकरणी डिचोली पोलिस पुढील तपास करीत आहेत.

उपलब्ध माहितीनुसार, डिचोली शहराला टेकून असलेल्या एका गावातून गेल्या रविवारी दुपारपासून ही मुलगी बेपत्ता असल्याचे कळते. बेपत्ता मुलगी ही परप्रांतीय असल्याचे कळते. याप्रकरणी बेपत्ता मुलीच्या पालकाने पोलिसांत दाखल केलेल्या तक्रारीनुसार पोलिसांनी शोध मोहीम सुरू केली आहे.

वर्षभरात तीन प्रकरणे

डिचोली परिसरात अल्पवयीन मुलींचे अपहरण करण्याचे प्रकार वाढले असून, गेल्या वर्षभरात अशा तीन घटना घडल्या आहेत. या तिन्ही प्रकरणांचा छडा लावण्यात पोलिसांना यश आले आहे. चिंताजनक बाब म्हणजे, तिन्ही अपहरण प्रकरणात परप्रांतीयांचा हात असल्याचे उघड झाले आहे. गेल्या तीन दिवसांपासून बेपत्ता असलेल्या मुलीचेही अपहरण झाल्याचा संशय आहे.