जानेवारी महिन्‍यात रस्‍ता अपघात बळींनी प्रशासनाची झोप उडवली होती. त्‍यानंतर वाहतूक पोलिसांनी कंबर कसून, नियमांची कठोर अंमलबजावणी केली. त्‍यामुळे फेब्रुवारी महिन्‍यात अपघात घटले. गत वर्षीच्‍या फेब्रुवारीशी तुलना करता 12 टक्‍के अपघात कमी झाले. सरत्‍या महिन्‍यात चलनाच्‍या स्वरूपात 2 कोटी रुपये जमा झाले.

फेब्रुवारी महिन्‍यात नियमभंग करणाऱ्या 33,434 चालकांना चलने देण्‍यात आली. उत्तर गोव्‍यात 6,592 चलने देण्‍यात आली की जी गेल्‍या वर्षी 4,863 होती. दक्षिण गोव्‍यात 7,771 प्रकरणे नोंद करण्‍यात आली. तेथे गेल्‍या वर्षी 4662 प्रकरणे होती.

आसगाव येथील म्हापसा-शिवोली मार्गावर आज सकाळी झालेल्या अपघातात एक तरुण जागीच ठार एक जण गंभीर जखमी झाला. संजीत दास (२८, रा. मांद्रे व मूळ : बिहार) असे मृताचे नाव असून तो हॉटेलमध्ये कामाला जात होता. तर आलमगीर मलिक (३१, रा. पर्रा) असे जखमीचे नाव आहे.

हॉटेलमध्ये कामाला असलेला संजीत व आलमगीर हे दोघे दुचाकीवरून (जीए ०३ एई ५०९६) म्हापशाच्या दिशेने येत होते. तर रिक्षा टेम्पो (जीए ०७ एफ ६९५५) हा शिवोलीच्या दिशेने जात होता. यावेळी वळणावर हा अपघात समोरासमोर झाला. यात संजीत दास हा जागीच ठार झाला, तर पाठीमागे बसलेला आलमगीर हा गंभीर जखमी झाला. त्याला गोमेकॉत उपचारासाठी दाखल करण्यात आले आहे. हणजूण पोलिसांनी याची नोंद घेतली आहे.