Goa Sports: राष्ट्रीय क्रीडा स्पर्धेच्या आयोजनासाठी 92 कोटी रुपयांची बोली लावलेली असतानाही 110 कोटी रुपयांची बोली लावणाऱ्या कंपनीला त्याचे कंत्राट देण्याचे ठरल्याचा आरोप आम आदमी पक्षाचे राज्य संयोजक ॲड. अमित पालेकर यांनी ट्विटरवर केला आहे.

अनुभवी आयोजकाने 92 कोटी रुपयांची बोली लावलेली असतानाही त्याला डावलण्यात आल्याबद्दल त्यांनी ट्विटरवर तीन ट्विट करत आपली नाराजी व्यक्त केली आहे. त्यात याला क्रीडामंत्री गोविंद गावडे जबाबदार असल्याचे त्यांनी म्हटले आहे.

त्यांनी म्हटले आहे, की हॉटेल, वाहतूक फ्लीट किंवा खानपानाचा अनुभव नसलेल्या थॉमस कूकपेक्षा अनुभवी बोलीदार अधिक चांगला असताना २० टक्के जास्त दराने निविदा काढण्यासाठी संपूर्ण प्रक्रिया हेराफेरी आणि पक्षपाती केली होती.

गोव्यातील क्रीडा सुविधांच्या सुधारणांसाठी हेच पैसे वापरता आले असते. कारण गोमंतकीयांच्या कष्टाने कमावलेल्या कराच्या पैशातून हे केले गेले आहे. कमी अनुभवी कंपनी जास्त किंमतीत का निवडायची हा प्रश्न आहे.पैशाच्या चुराड्याला अधिकारी जबाबदार असतील, असेही पालेकर यांनी म्हटले आहे.