सासष्टी: मडगावातील जिल्हा प्रशासनाच्या मामलेदार कार्यालयात शनिवार, २८ रोजी आयोजित केलेल्या मेगा म्युटेशन शिबिराला उत्स्फूर्त प्रतिसाद लाभला. सकाळी १० वाजता सुरू झालेले हे शिबिर सायंकाळी ५ वाजता संपले व त्यात शेकडो लोकांनी त्यांच्या वकिलांमार्फत १०० पेक्षा जास्त प्रकरणे निकालात काढली.

सकाळच्या सत्रातील दोन तासांत ४५ प्रकरणे निकालात काढण्यात आली होती. आज दिवसभरात ६८५ फाईल्सचे पुनरावलोकन करण्यात आले. ९४ प्रकरणे प्रमाणित करण्यात आली तर ५८१ डुप्लिकेट फाईल्स नाकारण्यात आल्या, अशी माहिती देण्यात आली.

यासंदर्भात बोलताना मामलेदार प्रतापराव गावकर यांनी सांगितले की, या मेगा म्युटेशन शिबिराला लोकांचा व वकिलांचा चांगला प्रतिसाद लाभला. हे शिबिर दक्षिण गोवा वकील संघटनेच्या विनंतीवरून घेण्यात आले. सर्व पाचही मामलेदार कार्यालयांत अनेक प्रकरणे निकालात काढण्यात आली. जर गरज भासली तर अशाप्रकारची आणखी शिबिरे घेतली जातील.

तालुकावार शिबिरे घेण्याची मागणी

केळशीचे सरपंच डिक्सन वाझ यांनी सांगितले की, ही एक चांगली संकल्पना आहे. ज्या प्रकरणांमध्ये कसलाही घोळ नाही किंवा कौटुंबिक वाद नाही, ती प्रकरणे आज निकालात काढण्यात आली आहेत. आपण मामलेदार कचेरी व सरकारचे आभार मानतो. त्याचप्रमाणे अशाप्रकारची शिबिरे प्रत्येक तालुक्यात आयोजित करावीत.