India vs South Africa 2nd ODI: टीम इंडियाचा स्टार फलंदाज विराट कोहलीने रांची येथे झालेल्या दक्षिण आफ्रिकेविरुद्धच्या पहिल्या वनडे सामन्यात शानदार शतक ठोकून चाहत्यांची मने जिंकली. पण आता रायपूरमध्ये दुसऱ्या वनडे सामन्यात त्याने जे काही केले, त्यावर खुद्द त्याचे चाहतेही विश्वास ठेवू शकत नाहीत. विराटने या सामन्यात षटकार मारुन आपले खाते उघडले, जे त्याच्या खेळण्याच्या शैलीपेक्षा पूर्णपणे वेगळे आहे.

वनडे क्रिकेटच्या इतिहासात विराट कोहलीने (Virat Kohli) पहिल्यांदाच षटकार मारुन आपले खाते उघडले. सामान्यत: विराट एक, दोन धाव किंवा चौकार मारुन आपल्या खेळीची सुरुवात करतो, पण रायपूरमध्ये 'किंग' कोहलीने एक जबरदस्त आक्रमक शॉट खेळून आपले खाते उघडले.

विराट कोहलीने असा मारला ऐतिहासिक षटकार

रोहित शर्मा आणि यशस्वी जयस्वाल लवकर बाद झाल्यानंतर विराट फलंदाजीसाठी आला आणि त्याने आपल्या अनोख्या स्टाईलमध्ये सुरुवात केली. विराटने दक्षिण आफ्रिकेचा वेगवान गोलंदाज लुंगी एन्गिडी याच्या चेंडूवर आपले खाते उघडले. लुंगीने त्याला छातीजवळ येणारा एक शॉर्ट-पिच चेंडू टाकला. विराटने क्षणाचाही विलंब न करता त्यावर एक जबरदस्त पुल शॉट खेळला आणि चेंडू थेट स्क्वेअर लेग बाउंड्रीच्या पलीकडे पाठवला. विराटचा हा षटकार जवळपास 80 मीटरहून अधिक दूर गेला. सामान्यपणे विराट असा शॉर्ट बॉल जमिनीवरुन खेळतो आणि अनावश्यक धोका टाळतो, पण यावेळी 'किंग'चे इरादे पूर्णपणे वेगळे दिसले. त्याने आपला बदललेला आक्रमक दृष्टिकोन पहिल्याच चेंडूवर षटकार मारुन दाखवून दिला.

विराटने बदलला खेळण्याचा 'अंदाज'

विराटने आपली आक्रमकता रांचीतील पहिल्या वनडे सामन्यातच दाखवायला सुरुवात केली होती. त्या सामन्यात मैदानावर येताच त्याने दोन मोठे षटकार लगावले होते, ज्यामुळे गोलंदाजांवर सुरुवातीलाच दबाव आला होता. पहिल्या वनडे सामन्यात विराटने 135 धावांची तूफानी खेळी खेळली, ज्यामध्ये 7 उत्तुंग षटकार लगावले. विराट यापूर्वी 'चौकार' (Fours) मारण्यावर अधिक लक्ष केंद्रित करायचा, पण आता त्याने आपला 'गेम प्लॅन' बदलला. तो आता आणखी आक्रमक होऊन खेळत आहे, जे त्याच्या चाहत्यांसाठी एक मोठी भेट आहे. त्याची ही नवीन 'आक्रमक-शैली' टीम इंडियाला भविष्यात मोठी मदत करु शकते.

रायपूरमध्ये टीम इंडियाची खराब सुरुवात

रायपूर वनडे सामन्यात टीम इंडियाची सुरुवात फारशी चांगली झाली नाही. लवकरच दोन महत्त्वाच्या विकेट गमावल्या. मागील सामन्यात अर्धशतक ठोकणारा कर्णधार रोहित शर्मा दुसऱ्या सामन्यात केवळ 14 धावा करुन बाद झाला. त्याने नांद्रे बर्गरच्या ओव्हरमध्ये लागोपाठ 3 चौकार मारत चांगली सुरुवात केली, पण त्याच गोलंदाजाने त्याला झेल देण्यास भाग पाडले. युवा सलामीवीर यशस्वी जायस्वालने 38 चेंडूत 22 धावा केल्या, पण तो एक अत्यंत खराब शॉट खेळून पॅव्हेलियनमध्ये परतला. दोन महत्त्वाचे फलंदाज लवकर बाद झाल्यानंतर विराटने षटकार मारुन आपले खाते उघडत, संघाला आवश्यक असलेली आक्रमक गती देण्याचा प्रयत्न केला.