Vijay Merchant Cricket Trophy 2024 Goa Vs Bengal

पणजी: अर्धशतक केलेला आफ्रिद साब याच्यासह फलंदाजांनी जोरदार झुंज दिल्यामुळे १६ वर्षांखालील विजय मर्चंट करंडक क्रिकेट सामन्यात गोव्याच्या संघ बंगालविरुद्ध फॉलोऑन टाळण्यात सफल ठरला. तीन दिवसीय सामना गुजरातमधील सूरत येथील सी. के. पिठावाला क्रिकेट मैदानावर सुरू आहे.

गोव्याचे वेगवान गोलंदाज कर्णधार शमिक कामत (४-५२) व शिवम सिंग (३-४१) यांनी पहिल्या दिवसअखेरच्या ७ बाद ३०५ वरून बंगालचा पहिला डाव गुरुवारी सकाळी ३२१ धावांत गुंडाळला. सामन्याच्या दुसऱ्या दिवसअखेर गोव्याने पहिल्या डावात ८ बाद १८० धावा केल्या होत्या, ते अजून १४३ धावांनी मागे आहेत.

आफ्रिदने सलग दुसऱ्या सामन्यात अर्धशतक करताना १५७ चेंडूंत १३ चौकार व एका षटकारासह ७३ धावा केल्या. फॉलोऑन टाळण्यासाठी ३३ धावांची गरज आणि तीन विकेट बाकी असताना कर्णधार शमिक कामत (१६) व मोहित यादव (नाबाद ३१) यांनी खिंड लढविल्यामुळे गोव्यावरील नामुष्की टळली.

संक्षिप्त धावफलक

बंगाल, पहिला डाव (७ बाद ३०५ वरून) ः ९७ षटकांत सर्वबाद ३२१ (सचिन यादव १०३, पापाई बाराई २३, शमिक कामत १६-२-५२-४, शिवम सिंग १४-२-४१-३). गोवा, पहिला डाव ः ८२ षटकांत ८ बाद १८० (सर्वांभ नाईक १९, बरहान दाश ४, साईराज गोवेकर ६, आफ्रिद साब ७३, विनीत कामत ०, साई नाईक २१, शमिक कामत १६, मोहित यादव नाबाद ३१, अरमान नदाफ ०, शिवम सिंग नाबाद ०, अगस्त्य शुक्ला १५-१०-१५-२, आकाश तरफदार २१-८-४२-६).