पणजी: गोव्याचे फलंदाज मोठी धावसंख्या उभारण्यास अपयशी ठरले, परिणामी २३ वर्षांखालील ‘स्टेट ए’ करंडक एकदिवसीय क्रिकेट स्पर्धेत गुजरातने गुरुवारी सहा विकेट राखून सोपा विजय मिळविला. एलिट ब गटातील सामना गुरुवारी बडोदा येथील मोतिबाग क्रिकेट मैदानावर झाला.

प्रथम फलंदाजीचे आमंत्रण मिळाल्यानंतर गोव्याचा डाव ४७.२ षटकांत १८६ धावांत संपुष्टात आला. वीर यादव (४७) व जीवनकुमार चित्तेम (४०) यांनी दुसऱ्या विकेटसाठी केलेल्या ५५ धावांच्या भागीदारी व्यतिरिक्त गोव्याच्या संघाला सावरणारी भागीदारी झाली नाही. विजयासाठीचे १८७ धावांचे लक्ष्य सहज गाठताना गुजरातने ३४.४ षटकांतच ४ बाद १८९ धावा केल्या.

गोव्याचा हा तीन लढतीतील दुसरा पराभव ठरला. त्यामुळे त्यांचे चार गुण कायम राहिले. अगोदरचे दोन सामने गमावलेल्या गुजरातने पहिल्या विजयाची नोंद केली. त्यामुळे त्यांचे आता तीन लढतीतून चार गुण झाले आहेत. गोव्याचा पुढील सामना झारखंडविरुद्ध होईल.

संक्षिप्त धावफलक ः गोवा ः ४७.२ षटकांत सर्वबाद १८६ (वीर यादव ४७, सनथ नेवगी ४, आयुष वेर्लेकर ०, जीवनकुमार चित्तेम ४०, आर्यन नार्वेकर ३२, अमन धूपर १०, शिवेंद्र भुजबळ १, लखमेश पावणे नाबाद २३, कुतबुदिन जमादार १४, अनुज यादव ६, विनायक कुंटे १, भव्य चौहान ३-५३, निर्मल प्रजापती २-६, क्रिश गुप्ता २-२८, प्रिन्स भलाला २-४०) पराभूत वि. गुजरात ः ३४.४ षटकांत ४ बाद १८९ (अहान पोद्दार १०६, रुद्र पटेल २२, आदित्य रावल नाबाद २२, लखमेश पावणे ४-१-१६-०, विनायक कुंटे ५-०-२९-१, कुतबुदिन जमादार ८-०-४६-१, अनुज यादव १०-१-४८-१, अमन धूपर ४-०-२५-०, जीवनकुमार चित्तेम ३.४-०-२३-१).