पणजी: अभिनव तेजराणा याने धडाकेबाज अर्धशतक नोंदविले; पण तो सय्यद मुश्ताक अली करंडक टी-२० क्रिकेट स्पर्धेत पहिल्याच सामन्यात गोव्याचा पराभव टाळू शकला नाही. बुधवारी कोलकात्यातील जादवपूर विद्यापीठ मैदानावर झालेल्या लढतीत त्यांना उत्तर प्रदेशने सहा विकेट राखून हरविले.

एलिट ब गट लढतीत उत्तर प्रदेशने नाणेफेक जिंकून गोव्यास प्रथम फलंदाजीस पाचारण केले. तिसऱ्या क्रमांकावर फलंदाजीस आलेल्या अभिनवने अवघ्या ३५ चेंडूंत चार चौकार व सहा षटकारांसह तुफानी ७२ धावा केल्या, त्यामुळे गोव्याने ९ बाद १७२ धावा केल्या. अभिनवने सलामीस बढती दिलेल्या अर्जुन तेंडुलकर (२८) याच्यासमवेत दुसऱ्या विकेटसाठी ५५ धावांची भागीदारी केली.

यष्टिरक्षक-फलंदाज आर्यन जुयाल याच्या झंझावाती फलंदाजीच्या बळावर उत्तर प्रदेशने १८.२ षटकांत ४ बाद १७३ धावा करून सामना जिंकला. जुयाल याने नाबाद ९३ धावांच्या खेळीत ५७ चेंडूंचा सामना करताना ११ चौकार व तीन षटकार मारले.

गोव्यातर्फे दीपराज गावकर याने छान मारा केला; परंतु इतर गोलंदाज निष्प्रभ ठरले. दीपराजने चार षटकांत १९ धावा देत दोन गडी बाद केले. गोव्याचा स्पर्धेतील पुढील सामना चंडीगडविरुद्ध २८ नोव्हेंबर रोजी ईडन गार्डन्सवर होईल.

संक्षिप्त धावफलक

गोवा : २० षटकांत ९ बाद १७२ (ईशान गडेकर १६, अर्जुन तेंडुलकर २८, अभिनव तेजराणा ७२, सुयश प्रभुदेसाई ५, ललित यादव २, दर्शन मिसाळ ४, राजशेखर हरिकांत १२, विकास सिंग नाबाद २१, दीपराज गावकर २, शुभम तारी १, वासुकी कौशिक नाबाद ०, भुवनेश्वर कुमार ४-०-२३-२, शिवम मावी

४-०-२४-३) पराभूत वि. उत्तर प्रदेश : १८.२ षटकांत ४ बाद १७३ (आर्यन जुयाल नाबाद ९३, प्रियम गर्ग २८, समीर रिझवी ३८, वासुकी कौशिक ४-०-३०-२, अर्जुन तेंडुलकर २.२-०-२९-०, शुभम तारी २-०-३३-०, दर्शन मिसाळ

३-०-२५-०, दीपराज गावकर ४-०-१९-२, विकास सिंग २-०-१७-०, ललित यादव १-०-१८-०).