Goa Youth Festival: पणजीत युवा महोत्सव, 1 ते 2 डिसेंबर रोजी कला अकादमीत आयोजन; 10 हजार तरुण सहभागी होणार

पणजी: स्वामी विवेकानंद यांच्या जयंतीच्या अनुषंगाने दरवर्षी युवा महोत्सवाचे आयोजन करण्यात येते. यंदा १ ते २ डिसेंबर राज्यस्तरीय युवा महोत्सवाचे आयोजन कला अकादमी येथे आयोजित करण्यात आले आहे. उद्‍घाटन सोहळ्याला मुख्यमंत्री डॉ. प्रमोद सावंत उपस्थित राहणार असल्याचे क्रीडामंत्री रमेश तवडकर यांनी सांगितले.

गोवा छायापत्रकार संघटनेच्या कार्यालयात घेतलेल्या पत्रकार परिषदेत बोलत होते. यावेळी क्रीडा आणि युवा व्यवहार संचालनालयाचे संचालक डॉ. अजय गावडे उपस्थित होते.

तवडकर यांनी सांगितले की, या महोत्सवादरम्यान लोककला, लोकगीत, पेंटींग, कविता लेखन, कथा लेखन, छायाचित्रण आणि रांगोळी आदी स्पर्धा घेण्यात येणार आहेत.

या स्पर्धांमध्ये राज्यातील तरुणाईने मोठ्या प्रमाणात सहभागी व्हावे आणि आपल्या कला सादर करावी. जे या स्पर्धांमध्ये अव्वल येतील त्यांना राष्ट्रीय स्तरावर १० ते १२ जानेवारी दरम्यान नवी दिल्ली येथे भारत मंडपम येथे आयोजित युवा महोत्सवात सहभागी होण्याची संधी मिळणार असल्याचे त्यांनीसांगितले.

१० हजार तरुण सहभागी होणार

यंदा युवा महोत्सवाचे स्वरूप बदलण्यात आले असून विकसित भारताचे युवा नेतृत्व संवाद असे नामकरण करण्यात आले आहेत. हा युवा महोत्सव प्रामुख्याने संस्कृती, विज्ञान महोत्सव आणि विकसित भारत चॅलेंज ट्रॅक अशा तीन विषयांवर आधारित असणार आहेत.

यंदा पहिल्यांदा मराठी आणि कोकणीतून कविता आणि कथा लेखन स्पर्धेचे राज्यस्तरीय आयोजन करण्यात आले आहे. या महोत्सवात सहभागी होण्यासाठी शेवटची तारीख २८ नोव्हेंबर असून सुमारे १० हजार तरुण या महोत्सवात सहभागी होणार असल्याचे क्रीडामंत्री रमेश तवडकर यांनी सांगितले.