पणजी: हैदराबादच्या फलंदाजांनी रविवारी सय्यद मुश्ताक अली करंडक टी-२० क्रिकेट सामन्यात गोव्याच्या गोलंदाजांची यथेच्छ धुलाई करताना १६१ धावांचे विजयी लक्ष्य सात विकेट आणि सहा षटके राखून सहज गाठले. एलिट ब गट सामना कोलकात्यातील ईडन गार्डन्सवर झाला.

हैदराबादच्या तिघा फलंदाजांनी मिळून ११ षटकार मारले. यष्टिरक्षक-फलंदाज प्रज्ञय रेड्डी जास्तच आक्रमक होता. त्याने ६७ धावांच्या नाबाद खेळीत ३४ चेंडूंचा सामना करताना चार चौकार व पाच षटकार खेचले. त्यामुळे हैदराबादने १४ षटकांतच ३ बाद १६६ धावा करून सामना जिंकला. प्रज्ञय याने अमन राव (४०, २२ चेंडू, ३ चौकार, ३ षटकार) याच्यासमवेत दुसऱ्या विकेटसाठी ७१ धावांची भागीदारी केली.

हैदराबादचा हा स्पर्धेतील दुसरा विजय ठरला. त्यांचे आता तीन सामन्यांतून आठ गुण झाले आहेत. स्पर्धेतील एक विजय व दोन पराभव अशी कामगिरी असलेल्या गोव्याचे चार गुण कायम राहिले. हैदराबादने नाणेफेक जिंकून गोव्याला प्रथम फलंदाजीस पाचारण केले. गोव्याचा डाव बाराव्या षटकात संथ फलंदाजीसह ४ बाद ६७ असा गडगडला होता.

सलग दुसऱ्या डावात झुंझार आणि आक्रमक फलंदाजी केलेल्या ललित यादव याच्यामुळे गोव्याला ४ बाद १६० अशी काहीप्रमाणात आव्हानात्मक धावसंख्या उभारता आली. ललित ८५ धावांवर नाबाद राहिला. त्याने ४८ चेंडूंचा सामना करताना १० चौकार व तीन षटकार मारले. त्याने दर्शन मिसाळ (नाबाद १८) याच्यासमवेत पाचव्या विकेटसाठी ९३ धावांची अभेद्य भागीदारी केली. ललितने मागील लढतीत चंडीगडविरुद्धही निर्णायक नाबाद ८२ धावांची खेळी केली होती.

संक्षिप्त धावफलक

गोवा ः २० षटकांत ४ बाद १६० (अर्जुन तेंडुलकर ७, ईशान गडेकर १, अभिनव तेजराणा २१, दीपराज गावकर २३, ललित यादव नाबाद ८५, दर्शन मिसाळ नाबाद १८, तनय त्यागराजन ४-०-२०-२) पराभूत वि. हैदराबाद ः १४ षटकांत ३ बाद १६६ (तन्मय अगरवाल १९, अमन राव ४०, प्रज्ञय रेड्डी नाबाद ६७, राहुल बुद्धी १८, वासुकी कौशिक २-०-३०-०, अर्जुन तेंडुलकर २-०-१३-०, दीपराज गावकर २-०-२६-१, मोहित रेडकर १-०-२९-०, दर्शन मिसाळ ४-०-४१-१, विकास सिंग ३-०-२२-१).